Suoma stáhtaráđđi lea duorastaga ásahan vuosttaš sámi dálkkádatráđi njealji jahkái.
Suoma bealde Sámi dálkkádatráđđái leat nammaduvvon 12 ovddasteaddji. Dan Sámi dálkkádatráđis čohkkájit sihke dutkit ja sámi árbedieđu guoddit.
Ságadoalli dan Suoma beale Sámi dálkkádatráđđái lea doavttirgrádadutki Klemetti Näkkäläjärvi, Oulu universitehtas.
Eará dutkilahtut geat čohkkájit ráđis leat: Hilppa Gregow Dálkediehtolágádusas, Rauna Kuokkanen Lappi universitehtas, Päivi Meriläinen Dearvvašvuođa- ja buresveadjinlágádusas, Markku Ollikainen Suoma dálkkádatpanelas ja Henni Ylänne Nuorta-Suoma universitehtas.
Sámi árbedieđu hálddašeaddji lahtut leat Esko Aikio Ohcejogas, Petra Biret Magga-Vars Soađegilis, Antti-Oula Juuso Eanodagas, Raija Lehtola Anáris, Tuomas Semenoff Anáris ja Jussa Seurujärvi Anáris.
Suoma bealde Sámi dálkkádatráđi ulbmil lea buktit sámi dieđuid ja oaiviliid dálkkádatpolitihkkii Suomas ja leat sorjjasmeahttun áššedovdiorgána. Nu čállá Yle Sápmi.
