Vuođđoláhkalávdegoddi dan olis ordne almmolaš gulaskuddama guovvamánu 14. beaivvi. Dasa searvá Suoma beale Sámedikki delegašuvdna.
Sámedikki ságadoallis Pirita Näkkäläjärvis lea jáhkku ahte dan háve sámediggelága ođasmahttima olis bargu lihkostuvvá.
– Mis lea nana luohttámuš, ahte sámediggeláhkaevttohussii lea Suoma ráđđehusbellodagaid doarjja. Ja opposišuvnnas leat olu bellodagat, mat dorjot sámediggelága ođastusa ja evttohusa. Dán háve galggašii leat hui buorre vejolašvuohta oažžut dan viimmat dohkkehuvvot, dadjá Näkkäläjärvi Yle Sápmái.
Sámediggeláhkaevttohusa leat geahččalan loktet Riikabeaivvi meannudeapmái dassážii oba máŋgii. Mannan giđa oaččui Suopma ođđa ráđđehusa. Geassemánu 16. beaivvi diibmá almmuhedje sii ráđđehusprográmma mas oassin daddjo ahte sámediggelága olis barggut galget joatkašuvvat ja ahte dat galgá fas dolvojuvvot Suoma Riikabeaivái.
Loga eanet áššiid sámediggelága olis dáppe.
