-Almmuhus-
KULTUVRA– Min bargu lea nannet sáme­vuođa

– Min bargu lea nannet sáme­vuođa

-

-

Sančuari Heaika Hætta ii loga galgat ballat vaikko Girjás-duopmu lea dagahan ollu cielaheami sámiid vuostá Ruoŧa mediain. – Min bargu lea nannet sámevuođa ja oktavuođaid, dadjá son. 

Sančuari galgá bearjadaga doallat konsertta Johkamohkemárkaniid sámedánssas. Joavku leat máŋgii ovdal čuojahan Johkamohkemárkaniin 1980- ja 1990-logus. Maŋemus geardde go čuojahedje márkaniin  lei 1999. 

– Mun illudan fas vuolgit Johkamohki sámedánsii čuojahit bearjadaga. Dat leat oalle stuora meassut ja oalle olu olbmot. Go lea stuora beroštupmi, de lea somá vuolgit dohko, dadjá Heaika Hætta. 

Ii ábut ballat

Ruoŧas lea leamaš olu cielaheamit sámiid vuostá, muhto Heaika Hætta dadjá ahte ii ábut ballat. Dat hal leat unna oassi geat cielahit sámiid Ruoŧas. 

– Ii das ábut ballat, ja jus ballá, de cielaheaddjit leat vuoitán. Dál lea dušše vuolgit juoigat ja dahkat dan maid láve dahkat, iige diktit daid mearridit. 

Nannet sámevuođa

Heaika Hætta mielas sis lea maid deaŧalaš bargu artistan ja guoimmuheaddjin. 

– Lea sávvamis ahte min bargu nanne sámevuođa ja oktavuođaid,  sihke sámiid ja earáid gaskkas. Dat lea positiiva oassi min barggus. Mun dieđán maid ahte olu dáččat ja ruoŧŧelaččat liikojit sámi musihkkii. 

– Mus leat olu buorit muittut Johkamohkemárkaniin ja lávejit čuovvut mielde dáppe olbmot min konsearttaide ja muhtimat leat gávdnan ráhkisvuođa ja náitalan dohko. Nu ahte mii leat bargan servodatbarggu maid, moddjá Heaika Hætta. 

-Almmuhus-