-Almmuhus-
-Almmuhus-
OĐĐASAT– Mii leat juo addán eatnamiid ruonáenergiijai

– Mii leat juo addán eatnamiid ruonáenergiijai

-

-

Lágesduoddara boazosápmelaš lohká alddiineaset buori oamedovddu, go sii leat juo ovdalaččas addán eatnamiid ruonáenergiijii. Dál eai šat sáhte massit eatnamiid.  

Duorastaga čoahkkanedje Lágesduoddara orohaga badjeolbmot, sámediggeráđđi Maja Kristine Jåma (NSR), politihkalaš ráđđeaddi John Mathis Utsi ja Davvesiidda gielda čoahkkinastet bieggamilluid ja sisabahkkemiid birra. Boazodoalloorohaga ovddasteaddjit ledje Máret Láilá Anti, Jon Magne Anti, Geir Ánde Gaup ja Berit Anita Buljo Anti.

Lágesduoddara boazosápmelačča, Máret Láilá Anti mielas lei hui buorre čoahkkin, go su mielas lea dehálaš gulahallat Davvesiidda gielddain.

– Čilgiimet makkár váikkuhusat sisabahkkemiin leat min orohahkii, boazodollui, bargosajiide ja Kárášjoga gildii. Mii leat stuorra orohat ja boazodoallu lea kulturguoddi ealáhus. Juohke bieggafápmu lea áittan sámi kultuvrii, ja erenomážit go lea nu stuorra orohat. Ovdamearkka dihte jus buohkat heitet, de dat čuozašii Kárášjoga gieldda giellabirrasii ja kultuvrii, go de fárrešii 110 olbmo eret gielddas, dadjá Máret Láilá Anti. 

Addán doarvái eatnamiid

 Máret Láilá Anti lohká dál iežaset beassat dárkilit čilget váikkuhusaid Davvesiidda gildii.

– Logaimet ahte mii eat mieđit makkárge bieggafápmopárkka orohahkii. Mii leat čielgasit dadjan ahte eat dohkket bieggafápmorusttegiid min orohahkii. Mis lea buorre oamedovdu, go leat juo ovdalaččas addán eatnamiid čáhceenergiijai, mii lea ge ruonáenergiija. Lei hui buorre deaivvadit gielddain ja čilget váikkuhusaid. Doaivvun dieđusge dál ahte gielda váldá vuhtii ja duođalažžan buot maid mii leat muitalan, erenomážit dál go Davvesiiddas fas lea sámevuohta ealáskan. Dan oktavuođas smiehtan ahte Davvesiidda gielda lea geatnegahtton doalahit sámi kultuvrra, dadjá Anti. 

Dorjot ealáhusa

Sámediggeráđđi Maja Kristine Jåma muitala ahte orohat lei bovden sin mielde čoahkkimii, go váldo ášši čoahkkimis lei Davvi bieggamillopárkka prošeakta. 

– Boazoealáhus vuorjašuvvá sakka, ja sidjiide lea erenomáš noađđin Davvi bieggamilloplánat. Sámediggi doarju ollásit ealáhusa dán áššis, go mis lea čielga oaidnu mii guoská bieggamillohuksemiidda. Sámediggi lea vuostá daidda, dadjá Jåma ja čujuha dievasčoahkkin mearrádussii mii dahkkui jagi 2020.

Álbmotrievtti prinsihpat

Maja Kristine Jåma čujuha vásáhusaide mat čuožžiledje eará bieggamillohuksemiid oktavuođas, main boazodoallu vásihii stuorra negatiivvalaš váikkuhusaid. 

– Álbmotrievtti prinsihpat leat vuođđun buot sisabahkken áššiin, dajai Jåma ja deattuhii ahte Sámediggi ii doarjjo dákkár huksemiid.

Boazodoallu oassin gieldda identitehtas

Jåma muitala ahte Davvesiidda sátnejođiheaddji logai ahte boazodoalloealáhus lea oassi gieldda identitehtas. 

– Sávan ahte dan váldet vuhtii go galget meannudit ášši. Doaivumis gielddastivra čájeha ovddasvástádusa ja doarju boazodoalloealáhusa dán áššis. Mus leat stuorra vuordámušat ahte áššemeannudeapmái váldo mielde justte fal dat oassi go dadjet ahte boazoealáhus lea oassi gieldda identitehtas, dadjá Jåma

Loga maid:
Sátne­jođi­headdji hoahpuha Davvi-biegga­millo­párkka:  – Vai proseassat eai bisán

Loahpalaš mearrádus

Sámediggeráđđelahttu Maja Kristine Jåma muitala ahte Davvesiidda sátnejođiheaddji, Sigurd Kvammen Rafaelsen (Bb) dajai ahte eai leat vel gielddastivrra bealis dahkan loahpalaš mearrádusa áššis. Ávvir lea geahččalan oažžut sátnejođiheaddji ságaide, muhto son ii lean olámuttus otne. 

 

-Almmuhus-