Lagasrádio guldaleaddjit lassánit, čájehit ođđa logut. Fylkkain gos vuosttažin jáddadedje FM-sáddemiid, lea maid obbalaš rádioguldaleapmi lassánan.
Lagasrádio guldaleaddjit lassánit, čájehit ođđa logut. Fylkkain gos vuosttažin jáddadedje FM-sáddemiid, lea maid obbalaš rádioguldaleapmi lassánan.
Lagasrádioin leat guldaleaddjit lassánan eanas fylkkain, čájehit kvartála logut maid Mediabearráigeahčču ovdanbuktá preassadieđáhusas.
Romssas ja Finnmárkkus lea eanemus lassánan dan maŋemuš kvartálas, 7,4 proseanttas 11,7 prosentii. Dáin fylkkain lei rádiomolsašupmi juovlamánus.
14,3 proseantta guldaleddjiin olles riikkas guldalit lagasrádio.
– Lassáneapmi čájeha ahte lagasrádio lea dehálaš oassi mediavalljivuhtii, lohká Mediabearráigeahču direktevra Mari Velsand.
Eanemus lassánan oarjin ja lulde
Muhtun guovlluin lea obbalaš rádioguldaleapmi maid lassánan. Oarjjebeale riikkas ja lulimus fylkkain, ja muđui doppe gos ovdal 2017 geasi jáddadedje FM-fierpmádaga, leat lassánan guldaleaddjit. Sihke lagasrádioin ja riikkakanálain.
Eanemus leat oarjin ja lulde lassánan, gos 60,5 proseantta lohket ahte guldalit rádio, lassánan 55,5 proseanttas.
Guldaleaddjit bohtet ruovttoluotta
Dain guovlluin gos maŋemuš jáddadedje FM-fierpmádaga lea rádiogullan njiedjan, muhto lagasrádioid logut lassánit.
Eanemus njiedjá Romssas ja Finnmárkkus gos guldaleaddjit ledje 67,4 proseantta, ja dál leat 58,5 proseantta. Guovddáš Østlánddas njiedjá maid 58 proseanttas 55,6 prosentii maŋemuš kvartálas.
Mediabearráigeahčču vuordá ahte rádioguldaleapmi bisána ovtta dássái dán jagi mielde. Našunála mihtideapmi čájehii njukčamánu ahte bissu oalle stáđisin, ja veaháš lassána.
– Álggos njiejai rádioguldaleapmi, muhto dat lea fas njuolgame dál. Dan leimmet maid vuordán. Orru nu ahte rádioguldaleaddjit leat fas boahtime ruovttoluotta dain fylkkain gos álggos jáddadedje FM-fierpmádaga, lohká Velsand.
