-Almmuhus-
-Almmuhus-
OĐĐASAT– Mearrádus ealáskahttá dál Fálesnuori suohkana

– Mearrádus ealáskahttá dál Fálesnuori suohkana

-

-

Nussir ASA direktevra Øystein Rushfeldt lea ilus go dál viimmat leat ožžon doaibmalobi roggagoahtit veaikki ja lohká dan ealáskáhttit dál Fálesnuori suohkana.

Vuosttažettiin lea geahpádussan go logi jagi rahčámuš lea nohkan dál. Muhto deháleamos lea ahte Fálesnuori suohkan ja báikkálaš servodat lea dál, maŋŋel 12 jagi doarruma, ožžon dákkár stuorra fitnodaga mii ealáskáhttá servodaga. Sátnejođiheaddjit, mat leat leamaš ja lea, oktan suohkanstivramearrádusaiguin galget oažžut dás gudni ja rámi iežaset barggu ovddas.

 

– Earenoamáš dáhpáhus

Rushfeldt lohká ahte lea earenoamáš dáhpáhus go lea vuosttaš geardde go addo doaibmakonsešuvdna dakkár ođđa lieggaruvkedoibmii Norggas maŋemus 25 jagis.

– Nu ahte min mielas gal lea máilmme suohtas go dál viimmat luovvanii ášši.

 

Vuhtii váldit boazodoalu

Nussir ASA direktevra lohká ahte leat diehttelasat ollu hástálusat, ovdamearkka dihte movt vuhtii váldit boazodoalu.

– Lei váddásit go maid leimmet doivon, muhto boazodoallu han lea ožžon lohpádussan ahte ruvkedoaimmat bissehuvvojit guottetáiggi.

Rushfeldt muitala ahte son lea juste dál Eŋglánddas čoahkkinastime movt sii sáhttet šaddat máilmmis dat ruvke mas lea unnimus nuoskkideapmi dálkkádathástalusaid ektui.

 

 – Fertejit beare doahttalit

Rushfeldt ii loga ballat vuosttaldemiin ovdamearkka dihte boazodoalus, Sámedikkis ja luonddugáhttenorganisašuvnnain.

– Mun in bala das gal, go dál lea mearriduvvon. Dál šaddá ealas fas Fálesnuori suohkanis ja bohtet eambbo bargosajit, mii lea deháleamos. Lassin ferten vel deattuhit ahte lea dehálaš ahte mii roggat veaikki vai šaddá doarvái veaiki máilbmái.

Son lohká maid ahte vuosttaldeaddjit fertejit dál doahttalit mearrádusa ahte Fálesnuorri lea dál ožžon nu go sii áigot, ii ge loga áigut seaguhit iežas ovdamearkka dihte dasa maid Sámediggi áigu bargat áššiin.

 

Álggahit doaimma boahtte jagi

Øysten Rushfeldt lohká ahte sii leat plánen dán jagi vel bidjat loahpalaš teknihkalaš bargguid ja ruhtademiid oažžut sadjái, ja lohká ahte boahtte jagi de álggahuvvo doaibma Nussir ASA:s.

 

– Áidna váidudeaddji doaibma lea ahte ruvke ii ásahuvvo


Fieddara boazodoalli Nils M. Utsi lohká áidna váidudeaddji doaibma lea ahte ruvke ii ásahuvvo. Vuorkágovva: Kila Anti

Lohká boazodoalli Fiettar orohagas, Nils M. Utsi. 

– Nu go juo dihtet, de lea ruvke juste guotteteatnamis, ja dohko ásahit ruvkke, ii leat jáhkehahtti. Dat han lea vuođđun min joavkku boazodollui, mis han leat nuorat geat galggaše váldit dán árbbi viidáseappot, lohká Utsi.

Son lohká maid ahte ráđđehus lea dál čájehan ahte sis ii leat guđege ládje hállu vuhtii váldit iežaset ovddasvástádusa maid sii leat dahkan.

– Sii han leat dohkkehan ja váldán ovddasvástádusa olmmošvuoigatvuođarivttiide, muhto dál leat dan duššin dahkan. 

Son ii loga oaidnit makkárge eará váidudeaddji doaimmaid earret go ahte ruvke ii ásahuvvo.

 – Ii ruvke sáhte gokčat láhtteránuin guottetáigge, dat han boahtá leat das. Danne in oainne makkárge ávkki ahte sii lohpidit bissehit doaimma guottetáiggi. Ii ge jahki leat jagi viellja, guotteha ii dieđe goasse juste goas dat lea, de lea ge jearaldat vuhtii váldet go dan.

 

– Ii leat heittot dušše boazodollui

Utsi lohká ahte Riehpovutnii maid lea earenoamáš heittot go oaivvilda dat billista vuona.

– Ii leat eahpádus ge ahte billista sihke lagasbirrasis ja viidát maid. Meararávdnji doalvu áhpái ruskkaid. Meahccevalljodat billahuvvá maid ja mii galgat muitit ahte mii leat okta oassi meahcis ja luonddus, ii ge dasa dárbbat leat dutki dan ipmirdit. Jus mii galgat sáhttit eallit luondduvuogádagaid mielde, de eat sáhte álgit daid billistit ja danne ii galggašeruvke oba ásahuvvat ge. 

-Almmuhus-