Ođđa iskan duođašta man dehálaš lea ahte olmmoš ii jávkka bargoeallimis. Norgga čalmmehemiid lihttu oaivvilda ahte dat čielgasit dáhttu eiseválddiid sihkkarastit ahte olbmo, geat masset oainnuset, ožžot jođánis ja dohkálaš oahpahusa ja dárbbašlaš heiveheami vai doalahit iežaset barggu dahje besset bargat.
– Olbmot geat jávket bargoeallimis, vásihit ahte uvssat beaškkihit gitta sin maŋis. Dat mearkkaša ahte jus don šattat man nu geažil olggobeallái bargoeallima, de lea váttis máhccat, lohká Norgga čalmmehemiid lihtu váldočálli Per Inge Bjerknes preassadieđáhusas.
Dán raportta almmuhii SSB dahje Statistihkalaš guovddášdoaimmahat skábmamánu 16. beaivvi:
https://www.ssb.no/arbeid-og-lonn/sysselsetting/artikler/fa-kommer-i-jobb-etter-langt-utenforskap
– Mu oaidninváttisvuođat eai leat hehtten mu bargamis bargoeallimis. Sáhtán giitit VTAO ortnega, mii lea bissovaš láhčejuvvon bargu dábálaš fitnodagas, lohká Sølvi Nordbø, gii bargá beallebeaivvi Norgga čalmmehemiid lihtu Hordalándda fylkkakantuvrras.
Norggas leat 100 000 ohcamin barggu
Eiseválddit vuorddihit olusiidda fállat dárbbašlaš oahpahusa ja veahkki maŋŋá go lea massán oainnu ja fálaldat mii fállojuvvo lea hui váilevaš. Lea hirbmat váivi daid olbmuide geaidda dat čuohcá ja servodat massá mávssolaš gelbbolašvuođa. Bjerknes lohká 100 000 olbmo geain lea muhtinlágan rumašhehttehus háliidit barggu, muhto eai oaččo vejolašvuođa.
– Ii olmmoš masse bargonavccaid vaikko massá oainnu, dan maid dárbbaša lea oahppat bargat nuppe láhkai, lohká Bjerknes.
Norgga čalmmehemiid lihttu oaivvilda ahte bargonávccahisoadju lea maŋimuš čoavddus.
– Muhto ruhta ii galgga leat «álkes» čoavddus NAV:i vai eai dárbbaš fállat olbmuide oahpahusa ja heiveheami, lohká Bjerknes.
