Eanet go ovdal dieđihit vearrodieđáhusas ahte sis leat virtuála opmodagat nugo kryptovaluhta. Vuosttaš geardde leat táhpat stuorábut go vuoitu.
48 000 norgalačča leat dieđihan ahte sii eaiggáduššet kryptoruđaid, čájeha Vearroetáhta oppalašgeahčastat.
Maŋimus jagiid leat máŋga doaibmabiju álggahuvvon oažžun dihte olbmuid dieđihit iežaset vearrodieđáhussii.
– Leat ain beare unnán doahttaleamit. Muhto mii leat oaidnán buorráneami áiggi mielde, dadjá vearrodirektevra Nina Schanke Funnemark. Son muittuha ahte buohkain lea vejolašvuohta divvut vearrodieđáhusa golmma jagi sisa maŋŋá áigemeari.
Vuosttaš geardde oaidná Vearroetáhta ahte massimat leat stuorábut go vuoitu. Sivvan dasa lea earret eará kursanjiedjan 2022:s. (©NTB)
