Diimmá ektui leat gaskamearálaš árvosánit loktanan ohppiin geat gerget joatkkaskuvllas. Šluhttejuvvon eksámenat leat oassin čilgehusas.
Guovtti vahku dassái bohte bohtosat mat čájehit ahte logátluohkkálaččain ledje gaskamearálaš bohtosat badjelis eará jagiid ektui. Dál čájehuvvo ahte joatkkaskuvlla mannan skuvlajagi oahppit maid leat buoridan árvosániid eará jagiid ektui.
– Vaikke lassáneapmái juohke fágas ii leat áktánas stuoris, de ii leat dábáláš ahte árvosánit loktanit olu fágain seamma áigge, dadjá oahppo- ja integrerenministtar Guri Melby (G) preassadieđáhusas.
Analysat čájehit ahte 41 fágas dan 46 oktasašfágas leat gaskamearálaš árvosánit loktanan diimmá ektui. Gaskamearálaš árvosánit leat lassánan 4,1:s gitta 4,2:i dain fágain.
Sivvan dasa lea go korona geažil šadde šluhttet eksámeniis ja oahpaheaddjit ožžo buoret áiggi árvvoštallat juohke oahppi čehppodaga.
Logut maid čájehit ahte nieiddat ain ožžot buoret árvosániid, nu go ovdal.
