Kárášjoga albmáin dušše okta mihttu

Diibmu guđas duolmmastedje OffroadFinnmark 300 kilomehtera luohkká sihkkelastit mátkái ja lagabui 90 joavkku ledje vuolggasárgás. Albmáid luohkkás badjelaš 60 oasseváldi, nissoniid luohkkás gávccis ja Mix-joavkkut lagabui 20.

Vuosttaš háve mielde

Kárášjoga Sihkkelklubba ovddasteaddji Jonas Gulsrud oasalastá vuosttaš háve OffroadFinnmark gilvvuide ja su gilvoguoibmi Jørn Mikael Eriksen Engstad ges nuppes.

 – Mun in dieđe sihkkarit manin mun háliidan oasálastit. Lean ieš maid ollen jurddašit dan máŋgii ovdal gilvvu. Mun liikon sihkkelastit ja leat duoddaris ja dasa lassin hui mielas gilvalit. Vaikko in leatge gilvaleamen golmma buoremus sajis, dahje logi buoremus.

Erenomaš hástalus

Jonas Gulsrud muitala iežas dovdat ollu oasálastiid ja muitala ožžon erenomaš hástalusa.

 – Guovdageaidnulaš Per Aune Buljo hástalii munno “duoddara gilvui”. Kárášjohka Guovdageainnu vuostá, dáidá šaddat garra gilvu, čaimmiha son.

Gulsrud lohká iežas mihttun leat čađahit gilvvu ja nagodit duolbmut 300 kilomehtera 24 diimmus.

– Moai ledne ráhkadan plána dan mielde. Muhto jus čađahetne 26 diimmus, de in gal áiggo čierrut dan dihte, mojohallá son.

Plánen guhká

Jonas Gulsrud dadjá iežas plánen jo guhká searvat gilvvuide ja muitala su jearran Jørn Mikaelis cuoŋománus ahte galgabago cegget joavkku, go deaivvadeigga čuoigamiid oktavuođas.

 – Ledjen jo jearran moaddásis, muhto in lean ožžon ovttage mielde. Jørn Mikael lei mielde seammás ja lean hui ilus go searvvai, go muđui ii livčče musge šaddan gilvu, čilge son.

Mielas mielde

Kárášjohkalaš Jørn Mikael Eriksen Engstad muitala mielas vuolgán mielde gilvui, go liiko muđuige valáštallat ja lea oktii árat searvan OffroadFinnmark gilvvuide. Son lea maid veahá gealdagasas justa ovdalaš vuolgga.

 – Mun serven golmma jagi áigi, muhto bártidin inge joavdan mollii.  Mun gal in leat nu ollu ráhkkanan, muhto lean hárjehallan máŋga jagi.