-Almmuhus-
VALÁŠTALLANArvi leamaš hástalussan muhto ii hehttehussan

Arvi leamaš hástalussan muhto ii hehttehussan

-

-

OffroadFinnmark 700 luohkká sihkkelastit vásihedje hástalusaid arvvi geažil gaskavahkku ja muhtimat ledje galbmostan, de leat lihkká doallan alla leavttu.

OffroadFinmmark gilvojođiheaddji Jørund Greibrokk muitala sihke mix-joavkkuid ja albmáid joavkkuid vásihan hástalusaid ikte arvvi geažil.

 

Njuoskan badjeloivviid

Greibrokk muitala gilvaleddjiid sihkkelastán njuoskkasin stuorra gaskkaid gaskavahkku arvedálkkis.

– Muhto temperatuvra ii leamaš nu vearrái. Muhto lea čielggas ahte arvi lea dagahan sihkkelastima veahá losibun gaskkohagaid. Muhto dál lea obbadálki ja máđii lea goikagoahtán. Bearjadahkii lea maiddái dieđihan fiinna dálkki, dadjá Geirbrokk Ávvirii duorastaga ovdal gaskabeaivvi.

 

Čoskkiidan

700 kilomehtera luohkká sihkkelastit, geat ledje guhkimus šaddan duolbmut arvedálkkis, ledje galbmon go ollejedje Váljohkii.

– Go sii ollejedje Váljohkii ja dulbmon guhkes gaska njuoska biktasat alde, de ledje eatnašat čoskkiidan, go ovdal Váljoga lea vel alla mihtolat, gos lea oalle garra leaktu. Sihkkelastit ledje duhtavaččat beassat sisa ja oažžut biepmu, muitala Greibrokk.

 

Guođđán guvttiin diimmuin

Kárášjogas lea golmma diimmu bákkolaš vuoiŋŋasteapmi ja Mix-joavkkuin, lei Team Rye XP-Merida (712) lei ovdal gaskabeaivvi ain njunnošis ja guođđán nuppi joavkku Team Arzgebirg (704) measta guvttiin diimmuin ovdal Šuoššjávrri.

– Lea mannan hui bures, vaikko muhtin joavkkut leat gaskkalduhtán, dadjá son.

 

Doallan lihkká alla leavttu

Vaikko arvves dálki lei lossudan gilvomáđii, de leat buot joavkkut goittot doallan alla leavttu. Greibrokk lohká albmáid njunuš joavkku Team Diesel/Pearl Izumi lokten fas leavttu, vaikko árvvoštalle gaskavahkku gaskkalduhttit Leavnnjas. Sii goittot jotke mátkki ja leat guođđilan earáid, vaikko sis okta lahttu gaskkalduhtii Leavnnjas.

– Dat mii lea erenomáš, ahte Mix-joavkkut dábálaččat jovssahallet albmáid joavkkuide, geaid vuolgga lea guhtta diimmu maŋŋel Mix-joavkkuid ollu árat. Nugo diibmá jokse albmát Mix-joavkkuid ovdal Leavnnja ja dál eai juksan ovdal go ovdalaš Šuoššjávrre ja manne meattá. Eai goassege ovdal leat Mix-joavkkut sihkkelasttán ná jođánit, deattuha Greibrokk.

 

Vuolgga otne

Vuosttaš 700 luohkká gilvaleaddjit vurdojuvvojit bearjadat iđida rájes mollii Álttá guovddážis.

Otná eahkeda diibmu 18.00 lea maiddái OF 300 luohkká vuolgga Álttá guovddážis ja vurdojuvvojit mollii ihttá eahkeda mielde.

 

 

 

 

 

 

 

 

 

 

 

 

 

 

-Almmuhus-