Doaladeigga njunnošis gitta mollii ja diđiiga vuoitit

Albmáid njunušjoavku OF 700 gilvvus, Team diesel/Pearl Izumi, geat leaba Anders Bernhoft ja Sten-Are Harjo, joavddaiga ovddemuš mollii Áltái ievttá eahkeda diibmu 20.00. Soai diđiiba jo Guovdageainnu rájes vuoitovejolašvuođaid stuorisin ja leigga measta sihkkarat vuoitit.

Njulgestaga birgetmeahttumat
Soai vulggiiga Kárášjoga goalmmádin viidáset Šuoššjávrri guvlui ja doabaigage guokte joavkku mat ledje ovddabealde.
Das rájes doaladeigga njunnošis gitta mollii.

Nubbin bođii Team 24, geat ledje 8,5 diimmu maŋábealde vuoitojoavkku moalas ja goalmmát joavku Team Fjell og Sykkelservice joavddaiges lávvardat iđida ovdalaš beal čieža, 10,5 diimmu maŋábealde vuoitojoavkku.

Okta ain jođus
Albmáid OF 700 luohkkás ledje 13 joavkku vuolggasárgás, muhto guhtta joavkku gaskkalduhtte.
Guhtta joavkku leat joavdan mollii ja okta joavku lea ain sihkkelastimin, Suoma joavku Team cellasys.

– Soai leaba ain sihkkelastimin, muhto joavdaba mollii muhtin áigge geahčen, muitala preassaovddasvástideaddji Kristen Albert Ellingsen badjelaš diibmu golmmas Ávvirii.

Buori movttas
Team diesel/Pearl Izumi albmáguovttos leigga hui buori movttas go Guovdageidnui joavddaiga duorastaga maŋŋel gaskabeaivvi. Dalle leigga soai sihkkelasten 469 kilomehtera maŋŋebárgga rájes. Sudnos lei issoras buorre leaktu leamašan álggu rájes.

Guođđán buohkaid
Go soai joavddaiga Guovdageidnui duorastaga diibmu 12.13, de lei nubbi joavku easka Šuošjávrris, 133 kilomehtera maŋábeale. Go beassaba gullat ahte lea dan mađe gaskka nuppi jovkui, de soai dovdoba šaddame buori moktii.

Bárti lei galgat juksat
Ávvir jearai dalle, ahte mii sáhtašii dahkat ahte galgaba vuoittáhallat dál dan nuppi jovkui, ja dasa lei sudnos hui čielga vástádus;

– Jus sihkkelrámma doddjo, de gal sáhttá šaddat váttis vuoitit, lohkaba soai ja leaba hui movttegat.

Lihkká ollu bártit
Ii lean lihkká áibbas bures mannan sudnuin dan lagabui 50-millas maid leigga sihkkelastán duorastat rádjai.
Soai muitaleigga olu boastut sihkkelastán mátkkis Álttá rájes gitta Levdnjii ja leigga maiddái sihkkelastán boasttu beale ovtta boazoáiddi dan duoddaris, nuppe saje fas ii leat dovdon luodda nu bures ja leat šaddan moadde kilomehtera guhkiid sihkkelastet go mii livččii dárbu.

Jotke goalmmát albmá hága
Stuorámus dramatihkka lei goittot go sudno goalmmát šattai báhcit Levdnjii jo gaskavahkku.
Sii ledje golmmas joavkkus álggos Álttás, muhto goalmmát olmmái, Geir Lien, vuovssadii Leavnnjas, ja ii šat nagodan maidege ja dan geažil ii sáhttán joatkit.

– Son gal lei áibbas geargan, ii lean vejolaš ge viidáset šat vuolgit sihkkelastet, muitalii Anders Bernhoft duorastaga Ávvirii.

Njunnošis olles mátkki
Mix luohkkás vuittii Team Rye XP – Merida, mas Linda Treseng ja Jørn Kandola maiddái doaladeigga njunnošis álggus gitta lohppii ja soai joavddaiga ovddemuš mollii ievttá eahkeda diibmu 23:12, vaikko Kandola bártidii bávččas čippiin loahppa mátkki.

Dán luohkkás eai lean go guokte joavkku ja nubbin bođii Team Arzgebirg. Soai joavddaiga mollii mannan ija diibmu 03:38.