-Almmuhus-
OĐĐASAT– Jus stáhta dál ii bisset Nussira, de dahkat mii dan ođđa­sit...

– Jus stáhta dál ii bisset Nussira, de dahkat mii dan ođđa­sit ja buore­but

-

-

Golggotmánus bissehii Hámmerfeastta suohkan Nussir ASA doaimmaid go balle guovllus ráfáidahtton elliid ja šattuid. Dál lea suohkan jorggihan áššis ja dáhttu fas Nussir ASA olles doibmii. – Dál lea okta doaivva vel, ja dat lea Stáhtahálddašeaddji, lohket luonddugáhttejeaddjit.

Lea Ifinnmark mii vuosttažettiin čálii dán birra. 

Golggotmánus dat Hámmerfeastta suohkan gaskaboddosaččat bissehii Nussir ASA bargguid, go njeallje organisašuvnna gávdne áššemeannudeamis boasttuvuođaid ja gáibidedje bargguid bissehuvvot. Duogáš dasa lei go Nussir ASA dáhtui roggagoahtit  ja hukset Márgobi guovllus, gos Nussir ASA:s  ii leat ruvkedoaibma-lohpi. 

Suohkan hilggui luonddugáhttejeddjiid váidaga

Luonddugáhttejeaddjit oaivvildit dan guovllu šaddet dárkilit guorahallat ovdal go sáhttet addit huksenlobiid, das go dan guovllus sáhttet leat gáhttejuvvon lottit, eallit ja šattut.

Guovtte vahku áigi dat suohkan hilggui váidagiid ja suovašii Nussir ASA hukset guvlui. Dál lea vel Romssa ja FInnmárkku Stáhtahálddašeaddji gii galgá loahpalaččat mearridit áššis. Suohkan lea iežas mearrádusa sádden Stáhtahálddašeaddjái. 

– Mii bisuhit huksenlobi ja dan leat cealkán Stáhtahálddašeaddjái. Mii háliidat dán prošeavtta iežamet suohkanii ja mii leat hilgon váidagiid main gáibidedje bissehit huksenbargguid, lohká Hámmerfeastta sátnejođiheaddji Terje Wikstrøm iFinnmark aviisii. 

Sádden reivve Stáhtahálddašeaddjái

Luonddugáhttejeaddjit imaštit go suohkan fáhkka jorggiha áššis dušše golmma vahku maŋŋel suohkan gilddii huksenbargguid go dáhtto vuos diehtit sáhttet go doaimmat billistit ja rievdadit luondduvalljivuođa agibeaivái. Dál sávvet ahte Stáhtahálddašeaddji, gii ii leat vel meannudan sin váidaga, bisseha bargguid. Luonddugáhttenlihttu lea velá sádden reivve Stáhtahálddašeaddjái ákkastallat manne huksenbargguid ferte gieldit.  

– Mii diehtit dien guovllus leat ráfáidahtton lottit, eallit ja šattut. Guovttis min searvvis leaba oahpu gazzan botanihkas ja soai dovdaba šattuid hirbmat bures. Soai iskkaiga šattuid unnit ráddjejuvvon guovllus. Dušše oanehis bottas gávnnaiga hárvenaš guobbariid. Dat guobbarat ges leat vuođđun 173 šaddui ja muhtin dain  šattuin leat ráfáidahtton.  Akšuvdnaleairra oasseváldit eai iskan makkár eallit guovllus leat, muhto báikkálaš olbmuid dieđuid mielde galget máŋga loddešlája guovllus leat ráfáidahtton, čállá Luonddugáhttenlihtu jođiheaddji Truls Gulowsen reivvestis.

BOAHTÁ FAS FINNMÁRKUI: Natur og Ungdom searvvi jođiheaddji  Therese Hugstmyr Woie lea gearggus fas akšuneret jus fal Stáhtahálddašeaddji maid doarju Nussir ASA huksenbargguid. Govven: Biret Inger Eira
BOAHTÁ FAS FINNMÁRKUI: Natur og Ungdom searvvi jođiheaddji  Therese Hugstmyr Woie lea gearggus fas akšuneret jus fal Stáhtahálddašeaddji maid doarju Nussir ASA huksenbargguid. Govven: Biret Inger Eira

Boahtá fas Finnmárkui jus lea dárbu

Natur og Ungdom searvvi jođiheaddji Therese Hugstmyr Woie diehtá dan reivve birra. Maiddái son dáhttu Stáhtahálddašeaddji bissehit bargguid nu guhká go eai leat čađahan váikkuhusguorahallama guovllus.  Son lohká iežaset gearggusin fas akšuneret Nussir ruvkedoaimmaid vuostá jus fal Stáhtahálddašeaddji ii bisset Nussir AS:

– Luohtán ollásit ahte Stáhtahálddašeaddji ii doahttal Hámmerfeastta suohkana. Ipmirdan bures go Hámmerfeastta suohkan hilgu min váidaga, go suohkan han ii gal dáhto vuiget boasttuvuođaid dahkan, lohká Therese Hugstmyr Woie Ávvirii.

Vuorddaša beassat huksegoahtit

Nussir ASA direktevra Øystein Rushfeldt lohká leat áibbas rivttes dagu Hámmerfeastta suohkanis go hilgo luonddogáhttejeddjiid váidaga. Dál vuorddaša songe maid Stáhtahálddašeaddji cealká áššis. 

VUORDDAŠA: Maiddái Nussir ASA direktevra Øystein Rushfeldt vuorddaša vástádusa. Govven: Marit Elin Kemi
VUORDDAŠA: Maiddái Nussir ASA direktevra Øystein Rushfeldt vuorddaša vástádusa. Govven: Marit Elin Kemi

– Lei vuordimis ahte suohkan hilgu váidaga ja dál ii leat go vuorddašit dassái go Stáhtahálddašeaddji cealká áššis. Dattetge ii leat dát stuora ášši, go dás han ii leat sáhka go hukselobis, lohká Rushfeldt Ávvirii ja ii dáhto kommenteret vejolaš demonstrašuvnnaid fas.

– Justa dál eai leat akšunisttat guovllus ja dasto ii leat dat vuos makkárge hástalus. In hálit ovddalgihtii dadjat maidege dan birra jus bohtet fas, go justa dál ii leat dat fáddán dáppe, lohká Rushefeldt. 

Romssa ja Finnmárkku stáhtahálddašeaddji meannuda ášši juovlamánu álggus.

-Almmuhus-