-Almmuhus-
-Almmuhus-
OĐĐASAT Joatkka­skuvllat ožžot 100 miljovnna ruvnno liige­goluide mat bohte korona­áiggis

Joatkka­skuvllat ožžot 100 miljovnna ruvnno liige­goluide mat bohte korona­áiggis

-

-

 – Go njoammun lassána dál olu guovlluin, de oaidnit mii dárbbu lasihit árvvoštallandoarjaga fylkkasuohkaniidda 100 miljovnna ruvnnuin, dadjá oahppo- ja integrerenministtar Guri Melby (O).

Maŋimuš áiggi lea njoammunlohku lassánan máŋgga gielddas ja suohkanis. Ráđđehusa ávžžuheami dihte leat olu joatkkaskuvllat mannan fiskes dásis rukses dássái, go čuvvot johtolatčuovgamodealla man Álbmotdearvvašvuođainstituhtta lea ráhkadan njoammunsuddjendoaibmabidjun mánáidgárddiide ja skuvllaide.

Liigegolut rukses dásis

Go skuvla manná rukses dássái, de buktá dat eambbo goluid fylkkasuohkanii, mii lea vásttolaš joatkkaskuvlla oahpus.

Rukses dásis galget joatkkaskuvllat juohkit ohppiid smávit joavkkuide mii addá dárbbu ovttastahttit fysalaš ja digitála oahpu. Gollodárbu sadjásaččaide, čorgemii ja njoammunsuddjendávviriidda stuorru, dasa lassin leat vel golut liigelanjaide ja doarvái kapasitehta skuvlasáhttui. Olu skuvllain leat maid golut go fertejit addit buori oahppofálaldaga ohppiide geat bissot ruovttus go leat dávdamearkkat.

– Buot dát doaibmabijut eai leat nuvttá. Liigečorgen, ja sadjásaččat eai lean skuvlabušeahtas go ráhkaduvvui dán jahkái. Danne ávžžuha ráđđehus liigeruđa fylkkasuohkaniidda. Lassánan njoammumiin lea gáibidahkes bargu skuvlaeaiggádii ja oahpaheddjiide, muhto mis lea oktasaš ulbmil. Mánáide ja nuoraide ii galgga čuohcat, dadjá Melby.

Geaidda eanemusat čuohcá ožžot eanemus

100 miljovnna ruvnno árvvoštallandoarjja, mii dál galgá juhkkot, galgá vuođđuduvvot kártemis makkár fylkkasuohkaniin leat leamaš erenoamáš olu golut koronaheađi dihte.

– Ráđđehus berošta dain fylkkasuohkaniin maidda lea eanemusat čuohcan, ja dat galget eanemus doarjaga oažžut. Leat stuorra erohusat fylkkain, ja lea dehálaš ahte ruhta manná dohko gos lea stuorámus dárbu, dadjá Melby. 

50 miljovnna ruvnno friddjaskuvllaide

Ráđđehus ávžžuha maid buhtadit friddjaskuvllaide 50 miljovnna ruvnno ovddas goluide mat bohtet koronapandemiijas, nu ahte buhtaduvvojit sullii seamma dásis juohke oahppái go almmolaš skuvllain. Ortnet guoská iešheanalaš vuođđoskuvllaide ja joatkkaskuvllaide main lea dohkkehuvvon láhkavuođđu friddjaskuvlalágas, nu go Duiskka-Norgga skuvla Oslos ja Fránska skuvla Oslos.

Miljárddat gielddaide ja fylkkasuohkaniidda

Koronaheađi čađa lea ráđđehus leamaš čielggas ahte sii dorjot gielddaid ja fylkkasuohkaniid. Dan sii leat dahkan máŋggain doaibmabidjopáhkain. Gielddasektor lea dán rádjai ožžon 17,7 miljárdda ruvnno liigefievrrideapmin ja ekonomalaš doaibmabidjun.

– Dađi bahábut leat mii vásihan diliid go gielddat ja fylkkasuohkanat leat gáržžidan skuvllaid ja mánáidgárddiid bušeahtaid vai bušeahtta bissu. Dál bivdit mii báikkálaš politihkkáriid fuolahit ahte ruhta man mii juolludat manná skuvllaide, dadjá Melby.

Dan čállá Ráđđehus sin neahttasiiddus.

-Almmuhus-