Jávkannjuolggadus, mii doaibmagođii mannan skuvlajagi, orru leamaš ávkin. Lea unnit jávkan, ja eambbosat cevzet.
Jávkannjuolggadus, mii doaibmagođii mannan skuvlajagi, orru leamaš ávkin. Lea unnit jávkan, ja eambbosat cevzet.
Obbalaš jávkan joatkkaskuvllas lea olu unnon maŋŋil go jávkannjuolggadus bođii. Ovdal lei dábálaš ahte oahppis lea vihtta beaivvi ja 12 diimmu jávkan. Dál lea golbma beaivvi ja ovcci diimmu.
Eanemusat lea jávkan unnon sis geain lei olu jávkan ovdal. Dan čájehit logut maid Oahppodirektoráhtta ovdanbuvttii mánnodaga.
– Loahpalaš logut duođaštit daid loguid maid oaččuimet geasset. Dál ii leat šat eahpádus ahte jávkan lea unnon, ja sávan ahte jaskkoda dan birra, dan golbma jagi go galgá geahččaluvvot, lohká máhttoministtar Henrik Asheim preassadieđáhusas.
Logut čájehit maid ahte fidnofágaid oahppit jávket unnit go oahppospesialiserenfágain.
– Muhtumat balle movt jávkannjuolggadus váikkuhii daid hearkkimus ohppiid. Loahpalaš jávkanlogut čájehit ahte lea leamaš buorre ohppiide geain lei olu jávkan. Lean ilus, lohká Asheim.
Unnon beliin
Jávkan lea buot eanemus unnon fidnofágain. Olles beaivvi jávkan lea beliin unnin, ja diibmojávkan lea 40 proseanttain unnon. Fidnofága ohppiin lea dábálaččat golbma beaivvi, ja čieža diimmu jávkan. Oahppospesialiserenohppiin lea dábálaččat golbma beaivvi ja ovcci diimmu jávkan.
Ovddit skuvlajagi ledje 32000 ohppiin joatkkaskuvllain eambbo go 14 beaivvi jávkan.
– Diet joavku lea measta beliin unnon maŋŋel go bijaimet ođđa njuolggadusa. Dál lea 17000. Mii oaidnit maid ahte leat unnit oahppit geat heitet gasku skuvlajagi, lohká Asheim.
Eambbosat cevzet
Logut čájehit maid ahte eai leat liikká olusat geat ožžot ovtteža. Ovtteš lea seamma go ahte ii ceavzze fága.
Leat maid unnit oahppit geat heitet gasku skuvlajagi.
Beaivejávkan lea unnon buot fylkkain, muhto eanemusat Oslos ja Finnmárkkus.
Maiddái diibmojávkan lea unnon buot fylkkain, muhto Finnmárkkus lea unnon buot eanemus. (©NTB)
