-Almmuhus-
KULTUVRAIngebjørg (13) lea his­torjjálaš: – Illudan dahkat dan maid ráhkis­tan

Ingebjørg (13) lea his­torjjálaš: – Illudan dahkat dan maid ráhkis­tan

-

-

– Dat liggešii mu váimmu jus lean ovdagovvan ja váikkuhan nu ahte earát maid sámástit dan dihte go lávllun sámegillii, lohká MGP junior oasseváldi Ingebjørg Jakobsen.

– Lea nu ihána ártet jurddašit ahte dál dat dáhpáhuvvá ja ahte mun oaččun dán vejolašvuođa, lohká Ingebjørg movttain go Ávvir riŋge sutnje.

Ingebjørg Jakobsen (13) lea Ájluovtta skuvlla čihččet luohká oahppi ja lea mielde Melodi Grand Prix junior lávlungilvvus mii čájehuvvo NRK1:s miessemánu 28.beaivvi. Dál ii leat go badjelaš vahkku vel dassái go Ingebjørg čuožžu lávddis Telenor Arenas. Son lea vuosttaš gii lávlu MGP junior gilvvus julevsámegillii, ja dan ii leat okta ge dahkan ovdal.

– Mun lávllun ja hárjehalan koreografiija nu bures go sáhtán juohke beaivvi. Lea vuollel vahkku vel gitta dollen Osloi, ja hárjehalan 3-4 geardde lávlaga juohke hárjehallamis. In ábut beare máŋgii hárjehallat, go de ribahan jurddašišgoahtit eará diŋggaid birra, čilge son.

Sus lea álo leamaš beroštupmi lávlumii, ja daddjo ahte álggii čuojahit ja lávlut ovdal go oahpai hupmat albmaládje. Son lea ieš čállán lávlaga mainna searvá MGP-jr gilvvus, ii ge loga leamaš váttisin.

– Ráhkadin álggos jurddakártta ja dasto gávdnen cealkagiid jurddakárttas maid heivehin oktii. Šuokŋa bođii maid veháš maŋŋelaš. Go gávdnen šuoŋa de gávnnahii áhčči movt čuojaha gitárain lávlagii, čilge Ingebjørg.

DÁNSU: Ingebjørg liiko dánsut asttoáiggis, ja dánsun lea ávkin go searvá MGP juniorgilvui. Govven: Jan Ivar Jakobsen.
DÁNSU: Ingebjørg liiko dánsut asttoáiggis, ja dánsun lea ávkin go searvá MGP juniorgilvui. Govven: Jan Ivar Jakobsen.

Dánsu ja lávlu

Asttoáiggis láve gilvalit vuodjamis, lávlut, dánsut ja spáppa čiekčat.

– Mus lea musihkkabealli ja nubbi ges dánsunbealli. Mu eadni dánsu ja áhčči čuojaha gitára. Mus lea siessá maid gii lávlu, ja gii lea mu inspirašuvdna lávlumis, muitala Ingebjørg.

Lávlla lea su iežas birra, gos orru ja maid son liiko. Son lea rámis ruovttubáikkiinis ja háliidii ráhkadit lávlaga dan birra. 

Sámegielbirrasis bajasšaddan

Oassi lávlagis lea sámegillii, ja lea ovdal lávlon ja dánson sihke Nuoraid kulturdeaivvadeamis ja Sámi álbmotbeaivedoaluin. Sámegiella ii leat Ingebjørg ruovttugiella, muhto orru Ájluovttas gos son vázzá skuvlla. Sus lea julevsámegiella skuvllas ja lohká alcces lunddolažžan lávlut sámegillii.

– Dás Ájluovttas hupmá eanas oassi olbmuin sámegiela, ja lean unnivuođa rájes gullan sámegiela. Nu lea sámegiella šaddan oassin mus ja dan mun háliidan earáide čájehit. Vuosttaš luohká rájes lea leamaš sámegieloahpahus. Mun ain hárjehalan sámegiela ja sávan ahte šattan maid čeahppi boahtteáiggis sámástit, lohká Ingebjørg.

OVDAGOVVAN: Su stuorimus sámi ovdagova luottaid beassá Ingebjørg dál guorrat go lávke MGP junior lávdái. Govven: Jan Ivar Jakobsen.
OVDAGOVVAN: Su stuorimus sámi ovdagova luottaid beassá Ingebjørg dál guorrat go lávke MGP junior lávdái. Govven: Jan Ivar Jakobsen.

– Liggešii váimmu

Son ii loga fuobmán jurddašit ahte sáhttá leat ovdagovvan earáide go lávlu sámegillii.

– Dat liggešii mu váimmu jus lean ovdagovvan ja jus sáhtán lávlagiin váikkuhit nu ahte earát maid sámástišgohtet, lohká Ingebjørg.

– Makkár sámegiel sátni dahje cealkka lea maid dajat dávjjimusat?

– Sátni masa liikon bures lea «vájmo». Dovddan ahte váibmu lea maid geavahan olu áššiin. Go lean ilus, de ráhkadan váibmo-emoji, go lean buorre soapmasii de tevdnestan váimmu. Dat lea nu fiinnis, lohká Ingebjørg.

Sámi ovdagova luottaid vázzá

Ingebjørg mielas lea oalle ártet ahte son dál lea dan seamma lávddis go su stuorimus sámi ovdagovva, Black Sheeps joavkku lávlu Agnethe Saba, gii maid searvvai MGP junior gilvui 2008 ja vuittii.

– Jáhkán ahte ipmirdišgoađán man stuora dáhpáhus dát lea go ollen Osloi ja galggan lávlut máŋga duhát olbmuide. Dá lea dat maid mun ráhkistan bargat ja dat lea dehálaš munnje. Lea nu jáhkkemeahttun jurddašit, dadjá Ingebjørg Ávvirii, gii illuda dollet Osloi ja deaivat fas eará MGP-junior gilvaleddjiid geaiguin lea oanehisáiggis oahpásmuvvan.

– Dál lea dušše vahkku vel, in ge bala vehášge. Lean eanet gealdagasas. Dál dat šaddá duohta dat maid ožžon dieđu vihtta mánu áigi, ahte bessen viidáset finálii, dadjá Ingebjørg movttegit.

STUORA DOARJJA: Ingebjørg mielas lea nu suohtas go nu ollugat Ájluovttas dorjot su MGP junior gilvvu oassálastimiin. Govven: Jan Ivar Jakobsen.
STUORA DOARJJA: Ingebjørg mielas lea nu suohtas go nu ollugat Ájluovttas dorjot su MGP junior gilvvu oassálastimiin. Govven: Jan Ivar Jakobsen.

– Čuođis vulget mielde

Miessemánu 28.beaivvi lea Ingebjørg lávddis Telenor Arenas. Ingebjørg eadni, Tonje Jakobsen illuda go nieida lea oasseváldin MGP-junior gilvvus.

– Ii oro vehá ge duohta. Go sádde lávlaga gilvui, de ii leat nu stuora vejolašvuohta beassat viidáset auditionii. Vuohččan go lei auditionis lei 2019:s. Ingebjørg lea nu issoras čeahppi, go čállá ja lohká ollu. Mun gal nu hirpmahuvven go beasai mielde lávlungilvui, lohká Ingebjørg eadni Ávvirii, ja lohká ahte sii ledje buohkat nu ilus ja njuikkodedje go nieida beasai mielde finálii.

Dál leat ráhkkaneame dollet Osloi, ja lea stuora veahka vuolgime.

– Mii leat delegašuvnnas sullii čuođi olbmo geat vuolgit lulás. Leat luohkáolbmát, skuvlaolbmát ja bearaš geat vulget, ja mii nu illudit. Mii leat nu rápmásat Ingebjørgain, lohká Tonje Jakobsen.

Ingebjørg čilge čiekŋaleappot maid jurddaša go su ruovttubáikkis čájehit nu stuora doarjaga. 

– Mun nu illosan  go olbmot bidjet áiggi vuolgit Osloi ja doarjut mu. Oainnán man ovttasráđálaččat mii leat Ájluovttas, ja man buorit mii leat nubbi nubbái, lohká Ingebjørg.

Loga maid:
Áltálaš mielde MGP jr gilvvus

Loga maid:
– Munnje lunddolaš lávlut sámegillii

-Almmuhus-