Vuoras olmmoš, gii lei «MS Roald Amundsen» skiippa mielčuovvu, lea dál Romssa buohcciviesus covid-19 virusiin. Troanddimis lea guovtti eará mielčuvvui maid njommon.
Davvi-Norgga Universiteahttabuohcceviessu (UNN) dieđihii maŋŋebárgga ovdalgaskabeaivve ahte vuorasolmmoš, gii lea buohcciviesus virusa dihte, lei Hurtigruten ekspedišuvdnaskiippa mielčuovvu.
Oktiibuot ledje 386 mielčuovvu dan guovtti maŋimuš «Roald Amundsen» borjjasteamis, 209:s vuosttaš borjjasteamis ja 177:s nuppi. Guokte borjjasteami ledje suoidnemánu 17.–24. ja suoidnemánu 25.–31. beaivvi.
«Roald Amundsen» fatnasis leat njeallje bargi ain Romssa buohcciviesus, muhto eatnašat čálihuvvojit olggos dáid beivviid, dieđiha UNN.
Njommon mielčuvvui gii lea Troanddimis eret
Ovdalis dieđihuvvui ahte 70-jahkásaš olmmoš ja vuollel 10-jahkásaš mánná, Troanddimis eret, leaba iskojuvvon, ja sudno koroniskkus lei positiiva. Goappašagat leaba leamaš Hurtigrutena mielčuovvut.
– Njommojuvvon olbmot eaba leat ovttas bearrašiin. Goappašagat leaba erremis, nubbi ruovttus, nubbi eará gielddas, dieđiha Troanddima gielda preassadieđáhusas.
Guhtta hurtigrutenmielčuovvu leat iskkojuvvon Troanddimis. Dušše okta lea ožžon positiiva bohtosa gielddas, ja nubbi lea positiiva bohtosa ožžon eará gielddas.
Maŋŋebárgga galgá okta vel mielčuovvu iskojuvvot, gii lea Troanddimis eret.
Dovddastit rihkkuma
Oktiibuot leat 36 bargi Hurtigruten skiippas iskojuvvon ja leat ožžon dieđu ahte lea koronavirus.
Fitnodat ánui ándagassii vuossárgga eahkeda, ja dovddastit rihkkon rutiinnaid.
Skiipagoastideapmi lea maŋidan buot tuvrraid «Roald Amundsen», «Fridtjof Nansen» ja «Spitsbergen» ekspedišuvdnaskiippaiguin.
Preassakonferánssas vuossárgga dieđihii maid konseardnahoavda Daniel Skjeldam ahte guokte veahkamiellahtu «MS Fridtjof Nansen» skiippas leaba biddjon sirremii buozalmassymptomaid dihte.
©NTB
