Kárášjoga gielda ávžžuha álbmoga sirdit doapparlihtiid, biillaid ja gálvojoriid eret geainnuin.
Vuossárgga, njukčamánu 21. beaivvi, álge Kárášjoga báikeguovddážis heavvalastit buot gielddageainnuid, čállá Kárášjoga gielda.
– Gielda ávžžuha buohkaid sirdit doapparlihtiid, biillaid ja gálvojoriid eret geainnuin, amas heađuštit barggu.
Gieldda ovddasvástádus
Gielddas lea geaidnolága mearrádusaid vuođul ovddasvástádus čorget muohttaga gielddalaš geainnuin ja gáhtain. Stáhtas lea dat seamma ovddasvástádus riika- ja Eurohpágeainnuin, ja fylkkagielddas fas ovddasvástádus fylkkageainnuin.
Viste-/ dálloeaiggádiid ovddasvástádus
Kárášjoga gielda čujuha geaidnoláhkii mas čuožžu makkár ovddasvástádus viste-/ dálloeaiggádis lea. Viessoeaiggát čorge muohttaga ja heavvalastá iežas priváhta sisavuojáhaga.
Viessoeaiggát čorge iežas šiljus buot šaddodaga, mii lea olggobealde vistesadjerájá johtolatareálii (vázzinravda/geaidnu). Visteeaiggát ii oaččo muohttaga doalvut johtolatareálii (vázzinravdii/geainnu ala) ja galgá sirdit/doalvut vuojániid ja gálvojoriid mat eastadit johtolaga.
