Stuorámus johtolathástalus doaresbealguovlluin Norggas lea go geainnuid eai leat áimmahuššan, lohket olbmot doaresbeal guovlluin.
Norges Automobilforbunda (NAF) dahje Norgga automobiilalihtu 2023 johtaleaddjiidbaromehter čájeha ahte 42 proseantta doaresbealguovlluid álbmogis oaivvildit stuorámus váttisvuohta johtolagas leat heajos geainnut. Dušše 15 proseantta gávpotálbmogis oaivvildit dan seamma.
– Mii leat fuolastuvvan go doaresbealguovlluid geainnut sáhttet velá eanet hedjonit. Geainnut leat gollan hirbmadit ja jáhkkimis máksá lagabui 100 miljárdda kruvnna daid divodit. Dál vudjet olbmot gáržžes, gollan ja heajos geainnuid alde, lohká Handagard preassadieđáhusas.
Son lohká NAF mielas lea boahtte stáhtabušeahta juolludeapmi geaidnodivodeapmái oalle unnán, vaikko ráđđehus guhká lea lohkan sii háliidit áimmahuššat geainnuid. Handagard lohká lea dárbu juolludit unnimusat 1,5 miljárdda geainnuid divodeapmái amas dássi ii hedjon velá eambbo. Ahte gávpotolbmot vuoruhit earáláhkai go doaresbealguovlluid olbmot, vuhtto bures 2023 johtaleaddjiidbaromehteris. Gávpogis háliidit buoret kollektiivva johtolaga. Doaresbealguovlluid olbmot lohket stuorámus hástalus lea geainnuid áimmahuššan ja heajos kollektiivajohtolat.
Norstat lea NAF ovddas čađahat iskkadeami man oktiibuot leat 4 242 olbmo vástidan. Vástádusat leat juhkkojuvvon SSB (statistalaš guovddášdoaimmahaga) sentralitehtaindeavssa vuođul: gávpot, smávva gávpot ja doaresbealguovlu.
