– Ragnhild Lydia jođiha Kárášjoga sámiid searvvi, mii lágida sihke giella- ja duodjekurssaid, ovddida sámeáššiid ja vel lea dehálaš sosiála arena midjiide, ákkastallá Kirsi Paltto iežas nammadeamis Ragnhild Lydia Nystad «Juovlafuomašupmái».
Son čilge Ávvirii manin sutnje dat doaimmat, main Ragnhild Lydia Nystad lea leamaš mielde, leat dehálaččat.
– Mun liikon duddjot, ja sámiid searvi lea ordnen hirbmat buori vejolašvuođa. Dat lei munnje erenoamáš dehálaš. Ahte sámiid searvi lea ohcan doarjaga ovddidit duddjonvejolašvuođaid, ja mis leamaš hui fiinna giisákursa Kárášjogas. Dat lea leamaš munnje hui, hui dehálaš vásáhus ahte leamaš dakkár giisákursa ja mun bessen duddjot ovttas earáiguin geat leat mielde sámiid searvvis, muitala Kirsi.
Vuosttaš gearddi
Kárášjohkalaš Ragnhild Lydia Nystad lei ruovttus go Ávvir skuvihii gálledit su, ja muitalit mii lea ággan. Ávvir lohká Kirsi Paltto nammadeami ákkastallama ja geige skeaŋkkaža.
– Dát ii goassige ovdal dáhpáhuvvan munnje ahte oktage lea mu evttohan. Dát gal lea somá!
Ragnhild Lydia čohkká suffás, rahpa skeaŋkkaža ja muitala movt son sáhtášii dan skeaŋkkaža sisdoalu ávkkástallat.
– Sosiála arena
Ragnhild Lydia Nystad lea olu jagiid leamašan mielde Kárášjoga sámiid searvvis ja su mielas eanavuoigatvuođa áššit leat maid dehálaččat sutnje.
– Juste dál lea dat bargu mii galgá leat meahcceduopmostuolus ođđajagimánus. Dat lea Kárášjoga eatnamiid birra ja gii daid galgá oamastit, dadjá son.
Nystad muitala ahte searvi ráhkkana dasa dáid áiggiid. Son muitala ahte muđui ge searvvis leat leamaš olu doaimmat giela ja kultuvrra olis.
– Muhto Kárášjoga sámiid searvi lea čađa gaskka leamaš munnje sosiála arena. Ja sávvat mii doalahit dan dassážii go nuorat váldet dan badjelii.
– Olbmuin galgá leat liekkas, juovlaborramuš ja dorvvolašvuohta
Juovllat lahkonišgohtet ja danin Ávvir jearrá Ragnhild Lydia Nystadas juovlasávaldaga. Son dadjá ahte dál leat váttis áiggit, visot divro nu go borramušat, el-rávdnji ja eará gálvvut.
– Mun sávašin dan ahte šaddet buorit ja ráfálaš juovllat. Áiggun hástalit olbmuid leat mielde čoaggit ruđa ja addit oktasaš skeaŋkka olbmuide geat ieža eai birge. Ahte ožžot juovlaborramušaid ja ahte mánát ožžot juovlaskeaŋkkaid. Ja ahte buohkain livččii sadji gos juovllaid ávvudit. Jus olbmuin ii leat dat, de lea hui dehálaš ahte olbmot bovdejit sin iežaset lusa, dadjá Ragnhild Lydia Nystad.
