Ávvir lea dáhtton olbmuid sáddet evttohusaid geaidda galggašii addot veaháš fuomášupmi. Dalle čáliimet ahte ohcat olbmo gii buktá moji ja ilu, juogo bargosajis dahje astoáiggis. Mii ozaimet árgabeaisáŋgára.
Ellen Inga Kristine Hætta leage evttohan ahte Risten Elle Siri ánssaša fuomášumi.
– Maid? Gal dat láve nu heahpat nammaduvvot dákkáriidda, muhto lea hui somá goitge, reaškkiha Risten Elle go gullá manne Ávvir fitná su ságain.
Hætta ii čilge iežas árvalusas manne Risten Elle ánssaša dákkára, muhto Risten Elle jáhkká ahte dat lea dan dihte go son bargá hui olu eaktodáhtolašbargguid ja doaimmaha olu Guovdageainnu ássiide.
Jus leat doalut gos nu suohkanis, doppe lea dávjá Risten Elle njunnošis.
– Hui somá oažžut dákkár fiinna skeaŋkka, moddjá son.
Olu bargu
Risten Elles leat olu doaimmat, vel juovllaid áigge ge. Duorastaga ja bearjadaga lea barggus eaktodáhtolašguovddážis, ja juovlaruohta áigu ávvudit «Juovllat buohkaide» -doaluin.
Son sáhttá muitalit ahte leat 20 olbmo dieđihan ahte bohtet doaluide, ja son sáhttá maid muitalit ahte juovlanigá fitná doppe.
– Muđui mun lean vuosttaš juovlabeaivve kinoi áhkkubiiguin. Nuppi juovlabeaivve leat spábbačiekčamat Báktehárjjis. Ja goalmmát juovlabeaivve leat juovladoalut mánáide kulturviesus.
