-Almmuhus-
GUOIMMUHEAPMIHáliidii addit unno­raččaide seamma vejolaš­vuođa nu go sus lei «dolin 1990-loguin»

Háliidii addit unno­raččaide seamma vejolaš­vuođa nu go sus lei «dolin 1990-loguin»

-

-

– Mun evttohan Kristin Norbye-Bekkelund Kárášjogas, guhte lea álggahan lášmmohallandoaimma unnimusaide, 0–6-jahkásaččaide, ákkastallá Saia manin Kristin galgá oažžut juovlafuomašumi. 

– Mánát ja váhnemat deaivvadit, stohket ja háleštit. Dat lea nuvttá buot mánáide, ja dalle dovdetge buot mánát ja váhnemat buresboahtima dohko, čállá Saia viidásit. 

Saia lea okta sis gii iežas mánáin čuovvu dan doaimma. Ja son lea hui duhtávaš dakkár fálaldagain. 

– Oktii vahkkui deaivvadit mii doppe ja mánát sáhttet hárjehallat sihke rumašlaččat ja sosiála beliid, nugo vuordit vuoru, ovttastallat, gulahallama ja ustitvuođa. Mánáidlášmmohallan nanne ovttasbarggu váhnemiid gaskkas ja ustitvuođa Kárášjoga gielddas. Dát doaibma sáhttá olu givssideami maid eastadit, danne lea Kristin Norbye-Bekkelund min árgabeaisáŋgár. Maiddái buot eará váhnemat ja mánát geat servet mánáidlášmmohallamii, loahpaha Saia. 

– Dat gal ledje čáppa sánit

Vástida Kristin Norbye-Bekkelund go Ávvir váldá oktavuođa ja logada Saia teavstta sutnje. 

– Mu mielas lea hui dehálaš ahte smávvamánát maid ožžot lihkadit. Dat lea buorre go mánát ovdánit fysalaččat, ahte besset lihkadit ja ieža bargat dan maid nagodit ja háliidit friddjastoahkama bokte. Ahte go ii oktage muital maid galget barget. 

Oahpásnuvvan eará mánáide 

Kristina mielas lea sosiála bealli dehálaš dán doaimmas go eai buot mánát vácce seammá mánáidgárddi. 

– Mis leat máŋga mánáidgárddi Kárášjogas. Muhto dáppe besset deaivvadit ja oahpásnuvvat mánáiguin eará mánáidgárddiin. Dat lea hui buorre. 

«Sirkus-kaos» 

Kristin muitala ahte lea máhccan ruovttubáikái 2019:s ja diđii ahte dakkáraš fálaldaga ii leat Kárášjogas. Son dadjá mánáidfálaldahkii viežžan jurdagiid iežas mánnávuođas.   

–  Muittán go mun ja mu oappát leimmet unnit. Mu áhčči lávii «sirkus-kaosa» lágidit ja dat lei sullii seammá maid dál lágidit ahte mánát stohket ja lášmmohaddet, geavahit daid reaidduid mat leat lašmmohallanlanjas ahte besset njuiket, bálkot spáppaid ja nu ain.  Mun maid háliidin dakkár vejolašvuođa mu mánáide go dat leat unnit dál. 

«Sirkus-kaos» lávii leat nu go dadjá Kristin, «dolin 1990-loguin».

–  Háliidin dahkat dan seammá, go dat lei hui somá dalle ja dieđusge livččii somá dan bargat dál, lohká son. 

70 juovlaskeaŋkka mánáide

Kristin muitala olu mánát servet vahkkosaččat mánáidlášmmohallandoibmii. Unnimusat 30 máná juohke vahku. 

– Dieđusge eai leat álo dat seammá mánát. Dál mis lei juovlaloahpaheapmi. Maret Lajla Nedrejord lei ráhkkanan ja ordnen juovlastálu ja vaikko maid. Maŋŋá son muitalii ahte lei ordnen 70 skeaŋkka mánáide maid juovlastállu buvttii. Hui somá go ná olu mánát ledje. 

Vurdet ođđa duhkorasaid

Kristin Norbye-Bekkelund muitala ahte sii aiddobáliid gerge ruhtačoaggimiin vai besset oastit ođđa duhkorasaid mánáide.  

– Olusat ledje addán ruđa, nu go olbmot ja nu maiddái fitnodagat. Dat lei issoras somá. Dál mii leat jo ožžon muhtin stohkosiid, muhto ain vuordit dan maid leat diŋgon. Beassat de mii geahččat mo mánát liikojit daidda duhkorasaide, dadjá son. 

– Leat ovttas bearrášiin

– Mun sávan ahte buohkat ožžot buriid juovllaid ja váldet áiggi leat bearrašiin ja vuoiŋŋastit. Seammaládje go mo mii dahkat go leat áiddo ožžon unna mánáža ja váldit áibbas gulul, ii ábut stresset go lea dehálut leat ovttas bearrašiin ja skihpáriiguin. Dat lea Kristin Norbye-Bekkelund juovlasávaldat Ávvira lohkiide. 

-Almmuhus-