Ávvir lea dáhtton olbmuid sáddet evttohusaid geaidda galggašii addot veaháš fuomášupmi. Dalle čáliimet ahte ohcat olbmo gii buktá moji ja ilu, juogo bargosajis dahje astoáiggis. Mii ozaimet árgabeaisáŋgára.
Ravdna Turi Henriksen lea evttohan Anne Lajla Utsi árgabeaisáŋgárin, ja sutnje galggašii geigejuvvot juovlafuomášupmi.
Turi Henriksen muitala ahte Anne Lajla ánssaša fuomášumi dan dihte go ovddida sámi filbmabarggu Sámis, mii lea olles Sápmái ávkin. Anne Lajla oliha maid olles máilbmái iežas bargguin ja áŋgirvuođain.
Giitevaš
Ávvir fitná Anne Lajla luhtte, geigeme skeaŋkkaža sutnje. Son hirpmahuvvá ja lohká hui somán go dákkár fuomášumi oažžu.
– Lea nu somá go olbmot oidnet sihke mu ja dan barggu maid dagan.
Anne Lajla lea giitevaš go Ravdna lea su evttohan, ja háliida giitit Rávnná go nammadii su árgabeaisáŋgárin.
Vuoiŋŋastit
Anne Lajlas eai leat stuora plánat dáid juovllaid, son áigu ruovttus návddašit basiid bearrašiin ja áigu vuoiŋŋastit vai lea gearggus ođđa jahkái ja ođđa hástalusaide.
Muhto vaikke áigu vuoiŋŋastit, de sus aŋkke lea veaháš bargu. Vuosttaš juovlabeaivve lea Sámi filbmainstituhtta lágideame kino Guovdageainnu ássiide, ja buohkat besset boahtit nuvttá geahččat ođđa filmma sámegillii: Olbmot, rievvárat ja Kardemomme-gávpot.
