-Almmuhus-
OĐĐASATJuolludit measta njeallje miljovnna sámi filmmaide

Juolludit measta njeallje miljovnna sámi filmmaide

View all posts Journalista

-

-

Guokte oanehis filmma, okta tv-ráidu ja guokte guhkes filmma ožžot dán vuoro buvttadandoarjaga 3,7 miljovnna ruvnno ovddas Internašunála Sámi Filbmainstituhtas (ISFI). 

– Lea nu illudahtti ahte leat ná ollu ođđa sámi filbmabuvttadeamit jođus dál. Amanda Kernell ođđa guhkesfilbma The curse – A love story lea ollen buvttadanmuddui. Lassin mii nannet guokte buvttadeami, Heajastallan ja Árru, mat ovdal maid leat ožžon ISFI:s buvttadandoarjaga. Maiddái nuorra filbmadahkki guovttos Johannes Vang ja Mihkkal Hætta oažžuba doarjagiid goabbat oanehisfilmmaide. Lea hui illudahtti oaidnit sámi filbmadahkkiid guhkes áiggi áŋgiris ovdananbargguid bohtosiid ja ahte filmmat dál leat ollen buvttadeapmái, dadjá Internašunála Sámi Filbmainstituhta direktevrra Anne Lajla Utsi preassadieđu bokte. 

Go filbma oažžu buvttadandoarjaga dat mearkkaša ahte filbma lea válmmas báddemii. Doarjja lea filmma buvttadeapmái, ja dát doarjja gokčá goluid filbmema oktavuođas, ja loahppabargui nu go čuohppan ja jietnabargu. Doarjaga ulbmil lea sihkkarastit sámegielat filbmaprošeavttaid buoremus vejolaš kvaliteahta ja nannet sámi filbmadahkkiid ja buvttadeddjiid.

ISFI juohká buvttadandoarjagiid njelljii jagis: guovvamánu 1. beaivi, miessemánu 1. beaivi, čakčamánu 1. beaivi ja juovlamánu 1. beaivi.

Filmmat mat ožžot buvttadandoarjaga leat:

THE CURSE – A LOVE STORY – Guhkes filbma. Juolluduvvon: 1 000 000 ruvnno. Buvttadanfitnodat: Forest People. Čálli ja bagadalli lea Amanda Kernell. 

HEAJASTALLAN – TV-ráidu. Juolluduvvon: 1 500 000 ruvnno.  Buvttadanfitnodat: Forest People. Čálli: Åse Katrin Vuolab. Bagadallit leaba Åse Katrin Vuolab ja  Pål Jackman. Ollislaš ISFI buvttadandoarjja HEAJASTALLAN prošektii lea 2 800 000 ruvnno. 

ÁRRU – Juoiganmusikála. Juolluduvvon: 800 000 ruvnno. Buvttadanfitnodat: Elle Sofe Company. Čállit leaba Elle Sofe Sara ja Johan Fasting. Bagadalli lea Elle Sofe Sara. Ollislaš ISFI buvttadandoarjja ÁRRU prošektii lea 1 300 000 ruvnno).

MER ENN BARE FJELL / MOVING MOUNTAINS (Bargonamma filmmas) – Oanehisfilbma.  Juolluduvvon: 200 000 ruvnno. Buvttadanfitnodat lea Aurinko Film AS. Čálli ja bagadalli lea Johannes Vang.

MUORRA – Oanehis filbma. Juolluduvvon: 200 000 ruvnno. Buvttadanfitnodat lea Forest People. Čálli ja bagadalli lea Mihkkal Hætta. 

-Almmuhus-