-Almmuhus-
-Almmuhus-
OĐĐASATHáliidit sihkka­rastit dearvvašvuođa­veahki boazo­sápmelažžii

Háliidit sihkka­rastit dearvvašvuođa­veahki boazo­sápmelažžii

-

-

Sámedikkis ja Davvi Dearvvašvuođas lea čoahkkin gaskavahku mas fáddán leat boazodoalu goavvejagiid hástalusat.

Sámediggeráđđi Runar Myrnes Balto ja politihkalaš ráđđeaddi John Maths Utsi galgaba čoahkkinastit gaskavahku miesemánu 18. beaivvi Davvi Dearvvašvuođa stivrajođiheddjiin Renate Larseniin. Čoahkkima fáddá leat goavvejagiid váikkuhusat boazodoalus. 

– Ulbmil lea digaštallat maid sii sáhttet bargat, lea go vejolašvuohta sihkkarastit veahki boazosápmelaččaide, dadjá Runar Myrnes Balto. Son lohká Sámedikki gulahallan ovdagihtii Davvi Dearvvašvuođain, ja dál lea dehálaš ovdanbuktit mo dilli justá dál lea boazodoalus. 

– Vuosttaš lávki lea movt sáhttá ráhkadit heivehuvvon fálaldaga boazosápmelažžii, go mii diehttit ahte hui dávjá sii vurdet hui guhká ovdal go bivdet veahki dahje ovdal go váldet oktavuođa dearvvašvuođabálvalusain. Nubbi dehálaš ášši leat mánát ja nuorat, sidjiide ferte leat vuosttasceahkkefálaldat, gos ja geainna sáhttet váldit oktavuođa jus lea lossa dilli sis, dadjá Runar Myrnes Balto ja lasiha ahte chat livčče ovdamearkka dihtii okta vejolašvuohta. 

Dearvvašvuođas rivttes gealbu

Sámediggeráđđelahttu ii loga alddis dearvvašvuođagealbbu, ja dan sivas lea dehálaš gulahallat Davvi Dearvvašvuođain. 

– Sis lea dat máhttu mo sáhttá sihkkarastit ahte gávdno fálaldat mii lea heivehuvvon boazodollui ja mo galget gávdnat dan fálaldaga. Berre leat fálaldat man lea álki gávdnat, dadjá Runar Myrnes Balto. 

Ođđa noađit

Dál lea áigi čuvggodan, muohta lea suddan ja goavvejahki dán hávvái lea mannamin loahpa guvlui, muhto dál bohtet ođđa hástalusat ja noađit maid boazosápmelaš ferte dustet. Runar Myrnes Balto lohká sin čađat oažžut dieđuid ahte  boazosápmelaččat vásihit nođiid ja ođđa hástalusat čuožžilit. 

– Justá dál leat boraspiret stuorra hástalussan, ja vel lassin lea dál áigodat go boazosápmelaš vásiha erenomáš olu vaši, dadjá Myrnes Balto ja čujuha skohterláhttogiddemii. 

– Olbmuin lea ain lossat , dadjá son 

Váttis oažžut doaimmaid johtui

Sámediggeráđđi lea árabut dán giđa čoahkkinastán Norgga Boazosápmelaččaid Riikkaservviin (NBR), SÁNAG:in  (Sámi našuvnnalaš gealbobálvalusa – psyhkalaš dearvvašvuođasuddjen ja gárrendilli), Guovdageainnu suohkanváldodoaktáriin ja Redd Barnain. Dasa lassin ledje Gielda- ja guovlodepartemeanta ja Mánáid- ja bearašdepartemeanta mielde observatevran.  Čoahkkimis ledje ovttaoaivilis ahte ferte dahkkot bargu čuvgehan dihte olmmošlaš beliid guohtunroasus ja dálkkádatrievdadusain.

Runar Myrnes Balto muitala guohtunroassu ja dálkkádatrievdamat mielddisbuktet juo stuora váikkuhusaid fysalaččat ja psyhkalaččat. Dasa lassin bohtet persovnnalaš ekonomalaš váikkuhusat dakkár roasuin, mii dagaha ahte noađit čuhcet vel garraseappot olbmuide.

– Ii leat nu álki oažžut doaimmaid johtui. Mii oaidnit ahte ášši bálkestuvvo juohke guvlui vuogádagas. Okta čuolbma lea ahte boazodoallu gullá Eanandoallodepartementii, ja dál leat viggan oažžut čađa ahte ferte eambbo ovttasbarggu leat departemeanttas. Sávan sii dál ipmirdit ahte dá lea dehálaš ášši, ja mii leat evttohan ahte bargojoavku ásahuvvo, mas leat departemeanta, boazodoallu, áššedovdit ja Sámediggi mielde. Bargojoavkku bargu lea ráhkadit guhkesáigeplána mo galgá dustet dili. Árvideames bohtet vel eambbo goavvejagit, lohká Runar Myrnes Balto. 

Olu lávkkit ain

Sámediggeráđđelahtus lea doaivva ahte boahtá fargga boađus dain olu čoahkkimiin. 

– Mii leat lávken moadde lávki ovddas, muhto leat ain olu lávkkit ovdal go ollet molli. Erenomáš ekonomalaš bealit lea okta čuolbma, dadjá Balto. 

Loga maid:
– In sáhte jurddašit ahte lean váiban, go boazu boahtá álo vuosttažin

Loga maid:
– Allet heaitte dieđih­eames heađi poli­tihkkáriidda

Loga maid:
– Boazo­doalu dilli lea issoras duođalaš

-Almmuhus-