Mánnodaga galgá olles Norgga álbmot jienastit ja mearridit geat galget suohkaniid jođihit boahtte njeallje jagi, muhto okta searvi cuiggoda válganjuolggadusa go oaivvildit leat eahpevuoiggalažžan.
Lea Álbmotregisttar mii mearrida leat go jienastuslogus vai it, ja Norgga bartaeaiggádat eai beasa jienastit suohkanis gos sis lea barta.
Seammás diehtit ahte lagabui 350 000 olgoriikka ássi besset jienastit, lohká Norgga bartasearvvi Audun Bringsvor preassadieđáhusas.
Suohkanválggas eará gáibádus
Jus áiggut jienastit stuoradiggeválggasn´, de fertet leat Norgga stáhtaboargár.
Suohkanválggas ii leat dakkár gáibádus, ja lea doarvái leat dieđihuvvon álbmotregistarii.
Olbmot geat leat olggobeale Davviriikkain eret, fertejit orrut riikkas unnimusat golbma jagi.
Muhto ruoŧŧelaččaide, dánskalaččaide, suopmelaččaide ja islándalaččaide lea doarvái leat registrerejuvvon ovdal geassemánu 30. beaivvi go lea válgajahki.
Olgoriikka jienasteaddjit lassánit
Ovddit suohkanválggas, mii lei 2015:s, de lei 313 000 olgoriikka ássis jienastanvuoigatvuohta, čájeha Statistihkalaš guovddášdoaimmahaga raporta.
– Go rehkenastá statistihkaid, de čájeha ahte lohku lea lassánan maŋemus njeallje jagi, nu ahte olgoriikkalaččat geat besset jienastit boahtte válggas, leat jo gártan 350 000, lohká Norgga bartasearvvi Norsk Hyttelag váldočálli Audun Bringsvor.
– Bartasearvi lea evttohan bartaeaiggádiidda addit jienastanvuoigatvuođa dan gielddas gos sis lea barta, lohká Bringsvor.
Doarjja ja vuosteháhku
– Mii leat ožžon positiiva oainnuid evttohussii, muhto maiddái vuosttehágu gullan. Leat eanemus báikkálaš politihkkárat geat eai leat ipmirdan evttohusa ja doivot min áigut jienastit máŋgga suohkanis oktanaga.
Bartaeaiggátsearvvi evttohusas lea jurdda ahte bartaeaiggát galgá beassat mearridit goappá suohkanis háliida jienastit.
– Doppe gos ássá álbmotregistara dieđuid vuođul dahje doppe gos lea barta, nu ahte ii hilggo «okta olmmoš – okta jietna» prinsihpa, lohká Bringsvor.
