Oaivvildit ahte ruovttokantuvra ii galgga šaddat gollun bargiide.
Mannan vahkku meannudii ráđđehus ođđa láhkaásahusa ruovttukantvurraide. Akademikerne čállá preassadieđáhusas ahte iskkadeamis, man Respons Anayse lea dahkan sin ovddas, boahtá ovdan ahte juohke goalmmát ii leat ožžon gokčot goluid mat gusket ruovttokantuvrii obanassiige. Leat maid stuora erohusat almmolaš ja priváhta sektoris.
Akademikerne čállá ahte dál lea áibbas bargoaddi duohken gokčojuvvojit go dárbbašlaš golut mat leat vai sáhttá čađahit barggu, ja nu boahtá leat go ráđđehus ii leat čielggadan ođđa láhkaásahusa.
Konstituerejuvon jođiheaddji Lise Lyngsnes Randeberg lohká sin hirpmahuvvan go ráđđehus čuovvu Solberg-ráđđehusa bálgá, eaige bija njuolggadusaid gokčat bargoreaidduid ruovttokantuvrras. Njuolggadusat leat dehálaččat dan dihte go doaivumuš máŋgačuođi duháha bargit barget čađat dahje muhtin áigge ruovttus maiddái maŋŋel korona, dadjá Randeberg.
Sii eai oaivvil ahte bargiide galgá dat šaddat olggosgollun, go fertejit gokčat dan maid dárbbašit vai sáhttet hálddašit barggu. Sin iskkadeapmi čájeha ahte juohke goalmmát ii oaččo gokčot goluid. Vearrámus lea almmolaš sektoris. Priváhta sektoris leat 45 proseantta ožžon gokčat interneahta, ja 81 proseantta telefovnna. Almmolaš sektoris ges 28 proseantta interneahta, ja 62 proseantta telefovnna.
Akademikerne maid oaivvilda ahte vearronjuolggadusat galget eanet bealatkeahtes mii guoská bargosadjái. Maiddái ahte eahpesihkarvuohta čadnon fidnolápmašuvvamiidda go ruovttokantuvra lea, ferte čielggaduvvot.
