Njealjis lohkásis, geain lea vejolašvuohta bargat ruovttukantuvrras, muitalit ahte leat maŋimuš mánu bargan ruovttus, čájeha ođđa guorahallan. Eatnašat háliidit dán ortnega bisuhit.
Leat liikká olu nissonolbmot ja dievdoolbmot, buot ahkeluohkáin, geat geavahit ruovttukantuvrra, čájeha Opiniona servodatdutkan.
Dutkamis vástidit 43 proseantta ahte leat bargan ruovttus maŋimuš mánu ja 64 proseantta dadjá ahte háliidit joatkit dáinna ortnegiin. Dušše 17 proseantta háliidit geavahit ruovttukantuvrra unnit, 12 proseantta ges eanet.
– Jáhkkimis joatkašuvvá ruovttukantuvrageavaheapmi maiddái 2023:s. Oallugat loktet ruovttukantuvrras leš dat pandemiija vai ii, ja oallugat háliidit bisuhit ruovttukantuvrra, lohká Opiniona seniorráđđeaddi Nora Clausen.
Moadde beaivvi ruovttus
Viidáset čájeha guorahallan ahte 64 proseantta ruovttukantuvrageavaheddjiin barget ruovttus 1–2 beaivvi vahkkui, 24 proseantta ges barget ruovttukantuvrras 3–5 beaivvi.
– Orro šaddan dábálažžan bargat ruovttus guokte beaivvi vahkkui jus olbmuin lea dát vejolašvuohta, lohká Clausen.
61 proseantta dadjá ahte besset ieža mearridit galle beaivvi barget ruovttus go bargoaddi ii leat ráddjen ruovttukantuvrageavaheami.
