Göteborga universitehta ja Oslo dieđalaš allaskuvla VID dutkan čájeha ahte biebmováhnemat leat dehálaš doarjjan nuoraide maŋŋá go leat deavdán 18 jagi.
− Olu biebmoruovttuid biebmováhnemat dorjot iežaset ovddeš biebmománáid. Doarjja sáhttá leat geavatlaš veahkki ja rávven, nu go mii dáhkádus lea ja makkára dárbbaša, ja fárrenveahkki, muitala Göteborga universitehta sosiála barggu professor emerita Ingrid Höjer.
Son lea ovttas Oslo dieđalaš allaskuvlla (VID, vitenskapelige høgskole i Oslo) professoriin Inger Oterholmain iskan makkár rolla biebmováhnemiin lea, maŋŋá go nuorat jovdet ollesolbmo ahkái ja fárrejit. Norggas serve 18 biebmováhnema ja Ruoŧas fas 17.
– Mo nuorat birgejit iehčaneaset go fárrejit biebmoruovttuin, lea čadnon sin mánnávuođa ja nuorravuođa vásáhusaide. Dutkan čájeha ahte olu biebmováhnemat ja sin oktavuohta biebmománáiguin lea dehálaš maŋŋá go biebmománát fárrejit, lohká Inger Oterholm.
Boradit mállásiid ja servvoštallet
Biebmováhnemat muitalit sii geahččalit doalahit oktavuođa nuoraiguin go guđđet biebmoruovttu. Oktavuohta sáhttá leat telefuvnna bokte, bovdet gaskabeivviide ja riegadanbeivviide, ja doalahit oktavuođa biebmománá ja buohkaid gaskka geaiguin biebmománná lea oahpásmuvvan biebmoruovttus. Muhto lei váddábut doalahit oktavuođa biebmománáin jus son ražai psyhkalaš váttisvuođaiguin.
– Olu biebmováhnemat deattuhedje nuoraid dárbbu, erenoamážit jus rahče psyhkalaččat, ássat biebmoruovttus maŋŋá go devde 18 jagi. Lea hárve ahte nuorat fárrejit ruovttus ná nuorran. Son guhte bákkus šaddá fárret eret ruovttus, dovdá stuorra oktonasvuođa, lohká Inger Oterholm.
– Lea dehálaš ahte sosiálabálvalus fuomáša ovddeš biebmománáid dárbbu oažžut doarjaga ja ahte biebmoruovttuid áŋgiruššan ja máhttu dáid nuoraid birra váldojuvvo vuhtii vaikko biebmoruovttu dilli heaittihuvvo ge, lasiha Inger Ingrid Höjer.
