Duodjeprofessor Gunvor Guttorm guovttos sámi girjjálašvuođa- kultur professoriin Harald Gaskiin muitaleaba soai leaba áimmahuššan Duodji Reader girjji doaimmahuslaš barggu ja čállosa Duodječállosiid mearkkašupmi sámi áddejupmái duojis ja eallimis.
Girjái leat čohkkejuvvon guoktenuppelot čállosa duoji birra sámi duojáriid ja dutkiid bokte maŋimuš 60 jagi. Sii leat: Harrieth Aira, Maja Dunfjeld, Mari Teigmo Eira, Harald Gaski, Gunvor Guttorm, Iver Jåks, Sigga-Marja Magga, Nils Oskal, Lars Pirak, Irene Snarby ja Nils-Aslak Valkeapää.
Njealji gillii girji
Leat Sámi allaskuvla ja Norske Kunsthåndverkere dahje Norgga dáiddaduojárat mat ovttasráđiid almmuhit girjji «Duodji Reader: Guoktenuppelot čállosa duoji birra sámi duojáriid ja dutkiid bokte maŋimuš 60 jagis. A selection of twelve essays on duodji by Sámi duojárat and writers from the past 60 years». Leat ovdal almmuhuvvon teavsttat, antologiija, maid professora guovttos Guttorm ja Gaski leaba čohkken ovttas sadjái. Teaksta girjjis lea sihke davvisámegillii ja dasa lassin julev-, mátta-, lullisámegillii ja eŋgelasgillii. Girjjis leat maid valjis govat maid badjelaš 30 duojára leat duddjon.
Girjji almmuhan doalus Sámi Girjjálašvuođaguovddážis Kárášjogas, guovvamánu 23. beaivvi eahkedis, muitaleaba soai mo eamiálbmogiid duojit miehtá máilmmi leat ožžon stuorát árvvu. Duodji lea maid dehálaš fáddá akademalaš máilmmis ja almmolaš digaštallamis. Professoraguovttos Guttorm ja Gaski muitaleaba eambbo dán fáttá birra gaskavahku eahkeda Kárášjogas.
