Snoasa vahátbivdojoavkku lahttu Jarle Sivert Holstad bážii 150-200 kilosaš guovžža 15 mehtera alddis eret. Guovža lea speadjan olu sávzzaid guovllus.
Čakčamánu nuppi beaivvi ovdalgaskabeaivvi báhččui guovža Nyseteren báikkis Snoasas. Snoasa vahátbivdojoavku geavahii guokte beatnaga mat gurre guovžža mii lea speadjan olu sávzzaid.
– Vázzen beatnagiid maŋis. Fáhkka iđistii guovža mus 15 mehtera eret ja dalle báhčen dan, muitala Jarle Sivert Holstad NRK:i.
Vaikko son bážii guovžža, de deattuha ahte ii livčče sáhttán dan dahkat jus olles vahátbivdojoavku ii livčče oassálastán. Lei Snåsningen mii ovddemuš dieđihii ahte guovža lea báhččon. Bivdojoavku muitala ahte sin meahccefuođđokámera lei govven dan 5-6 áiggi bearjadaga iđida.
Vahátbivdojoavku lea ožžon lobi guokte guovžža báhčit ja joavku lea dál ohcamin nuppi guovžža, go bivdolohpi nohká vuossárgga. Biebmobearráigeahčču lea gohččon sávzzaboanddaid viežžat sávzzaid ruoktot.
