Borgemánu 8. beaivvi almmuhuvvui Tjakten Tjåanghoe festivála prográmma. Prográmmas leat duodjemárkanat, kurssat, ságastallamat, njoarostangilvvut ja konsearttat.
– Dat mii lea earenoamáš dan jagáš festiválas lea ahte dát lágiduvvo Saemien Sijte ođđa visttis, dadjá festiválakoordináhtor Daniel Steinfjell Ávvirii.
Tjakten Tjåanghoe, Čakčačoahkkaneapmi davvisámegillii, lágiduvvo borgemánu 25.–28. beivviid dán jagis Snoasas. Tjakten Tsjåanghoe lea dehálaš deaivvadanarena mas lullisámi giella ja kultuvrra leat guovddážis nu go čuožžu festivála neahttasiiddus.
– Mii háliidit maiddái ávvudit nuoraid energiija sierra fáttá bokte, namalassii «Noere-baelien gaaje» bokte, lohká Daniel Steinfjell.
«Noere-baelien gaaje» mearkkaša fas «Nuorravuođa áiggi gájanas» davvisámegillii.
Tjakten Tjåanghoe lea lágiduvvon 2009 rájes juohke nuppi jagi. Daid gaskka fas lágidit Rasten Raastah festivála Plassjes.
