Norgalaččaide sáddejuvvojit reivvet dušše golmma gearddi vahkkus, muđui leat guoros poastakássat, dieđiha Poasta.
Norgalaččaide sáddejuvvojit reivvet dušše golmma gearddi vahkkus, muđui leat guoros poastakássat, dieđiha Poasta.
Dán áigge eai šat sáddejuvvo nu olu reivvet poastta mielde.
Mannan jahkeáigodaga njiejai poasttahivvodat 15,5 proseanttain, dieđiha Poasta.
– Juohke dállodoallu oažžu dušše golbma reivesáddema vahkkui, ja dalle ii leat šat vuođđu juohkit poastta beaivválaččat. Ferte gávdnot eará čoavddus aktevrraide, nu go aviissaide, main leat erenomáš dárbbut, lohká Poastta konseardnahoavda Tone Wille preassadieđáhusas.
Juohke nuppi beaivvi
Maŋimuš jagiid lea Poasta vikkahan politihkkáriid heaittihit beaivválaš poastajuohkima.
Stáhta máksá dál poastajuohkima ovddas viđa gearddi vahkkus, earret eará aviisajuohkima geažil.
Poasta dáhtošii láhkarievdadusa dakkaviđe.
– Lea dárbbašlaš rievdadit poastalága dán čavčča jo vai lea áigi rievdadit poastajuohkima juohke nuppi beaivái 2020 rájes. Jus dát ii dáhpáhuva, de joatká stáhta gánnátkeahtes bálvalusa máksima, lohká Wille.
