Johtalusdepartemeanttas muitalit ahte Posten Bring AS galgá árgabeivviid buktit aviissaid, Aktiv Norgesdistribusjon AS ges dahká dan lávvordagaid.
Ráđđehus almmuhii mannan jagi juovlamánu haddegilvvu. Áigemearrái leat dušše dat guokte fitnodaga buktán fálaldaga.
– Dat lea dehálaš buohkaide geat sávvet báberaviissaid oažžut ruoktot. Nu maiddái daid beivviid go boasta ii leat rabas. Dan mii sihkkarastit dainna šiehtadusain. Aviissaid distribušuvdna miehtá riikka lea dehálaš mediagirjáivuhtii ja doaresbeale abonneanttaide, dadjá johtalusministtar Jon-Ivar Nygård preassadieđu bokte.
Šiehtadus, man dál vuolláičállet, lea fámus suoidnemánu 1. beaivvi 2024 rájes gitta geassemánu 30. beaivvi 2025 rádjái. Dat sáhttá guhkiduvvot ovttain jagiin vel.
– Mediasuorgi lea viiddis digitaliseremis, seammás go báberaviissat leat ain dehálaččat suorgái. Sihkkarastin dihtii fleksibiliteahta vuolláičállit mii oanehisáigge šiehtadusaid eavttuin ahte dat sáhttet guhkiduvvot ovttain jagiin vel. Dat addá maiddái vejolašvuođa váldit vuhtii Poastalávdegotti raportta go dat almmuhuvvo jagi geahčen, dadjá johtalusministtar.
