Norrbottena regiovdna dieđiha gaskavahku ahte golmmas leat jápmán covid-19 dávdii leanas.
Leat dál 99 olbmo jápmán Davvi-Ruoŧas Norrbottenis koronadávdii giđa rájes. Njoammun maid lassána ja 114 olbmos lea maŋemus jándora dieđihuvvon dávda.
Dál leat maid 45 olbmo divššus Norrbottena buohcceviesuin. Njealjis leat maid intensiivadivššus.
Heahtečoahkkin
Norrbottena leana buohcceviesuin lei gaskavahku heahtečoahkkin go dieđihedje ahte sii dušše vuoruhit fáhkkabuhcciid ja koronabuhcciid dál ovddos guvlui.
– Mii vuoruhit dál dušše fáhkkabuhcciid ja koronabuhcciid ja eará dikšumat ja čuohpamat fertejit vuordit, dadjá leana hoavdadoavttir Pia Näsvall. Mii sávvat ahte njoammun bisána, muhto dán rádjái mii fertet bissehit eará dikšumiid gaskaboddosaččat, čilge son.
Eará dikšun bissehuvvo dál ja mearrádus doaibmá vahku ovddos guvlui ja de árvvoštallet ođđasit mot koronadilli lea, dieđiha Norrbottena regiovdna.
Sirdet buhcciid
Regiovnna buohcceviesut dieđihit maid ahte lea dárbu eanet dikšunsajiide leanas. Danin sii leat sirdigoahtán buhcciid Sunderby, Kalixa ja Bihtáma buohcceviesuid gaskka.
– Mii sirdit pasieanttaid gein lea covid-19, muhto jus bohtet olu buohccit geat dárbbašit divššu, de fertejit maid sirdit eará buhcciid, dadjá Luleju buohcceviesu ossodathoavda Anna Pohjanen pressadieđáhusas.
Sunderby buohcceviesus leat dál 34 olbmo divššus korona dihte.
– Go njoammun lassána, de dárbbašit maid eanet olbmo divššu, dađi báhábut, čilge Anna Alm Andersson, regiovnna ossodathoavda.
