Davvinjárggas lea koronanjoammun lassánan nu sakka ahte gielda lea ásahan njoammuneastadandoaimmaid.
Davvinjárgga gielddas leat registrejuvvon 74 koronanjoammuma dan rájes go pandemiija leavai Norgii.
Maŋŋebárggas duorastahkii dán vahkkus lea koronavirus duođaštuvvon 29 olbmos, ja vuordimis lassánit njoammumat.
Maŋŋel go njoammun lea sakka lassánan maŋimuš áiggi, de lea Davvinjárgga gielda mearridan ásahit doaibmabijuid.
Doaibmabijut
Koronaráddjehusat doaibmagohte skábmamánu 11. beaivvi ja gustojit vahkku:
– Olbmuin eai galgga eanet go vihtta guossi ruovttus, barttas dahje šiljus. Guossit geat leat ollásit boahkuhuvvon eai lohkkojuvvo.
– Guossohanbáikkiin galgá borramuš ja juhkamuš diŋgojuvvot ja dolvojuvvot bevddiide. Gussiid gaska galgá mehtera gaska.
– Mánát ja ollesolbmot badjel 12 jagi galget geavahit njálbmesuoji buvddain ja almmolaš visttiin. Dáin báikkiin galgá vejolaš buhtistit dahje spriitet gieđaid.
Muđui lea Davvinjárgga gielda mearridan ahte institušuvnnat dollet gitta vahkku 45 rádjai.
Ávžžuhusat
Davvinjárggas ávžžuhuvvojit maid olbmot bissut ruovttuin jus leat buohcci, ja čađahit koronaiskosa jus leat dávdamearkkat.
Muđui lea dehálaš bassat gieđaid dávjá ja gossat gardnjilii dahje njunneliidnái.
Olbmot geat leat boahkuhuvvon ja gártet lagas oktavuohtan muhtin koronabuohccái sáhttet eallit nu go dábálaččat, muhto berrejit váldit koronaiskosa jus ožžot dávdamearkkaid. Lagas oktavuođat mat eai leat boahkuhuvvon eai berre deaivvadit olbmuiguin čieža beaivái.
Eambbo dieđut gávdnojit Davvinjárgga gieldda neahttasiidduin.
