Virggálaš dieđuid mielde galget duháha olbmo Guoládatnjárggas gohččojuvvot oassemobiliseremii.
Čakčamánu 26. ja 30. beaivvi gaskkas leat mobiliserejuvvon 400 dievdoolbmo Guoládatnjárggas «erenoamáš soahteoperašuvnna» oktavuođas, čállá B-port murmánskka neahttaaviissa.
Sin searvvis ledje maid njeallje Lujávrri ássi. Dat diehtu boahtá ovdan Ruošša VK nammasaš sosiála medias, gos leat Luájvrri ássiid joavkkut.
Oassemobileseren
Čakčamánu 21. beaivvi almmuhii Ruošša presideanta, Vladimir Putin, oassemobileserema go galget riikaviidosaččat 300 000 dievdoolbmo nannet Ruošša soahteveaga «erenoamáš soahteoperašuvnna» oktavuođas Ukrainas.
Oassemobileseremii gohččojuvvojit olbmot geat leat ovdalaččas leamašan soahteveagas. Oassemobiliserema oktavuođas maid lea spiehkastanlistu masa gullet dievddut geat leat ovdamearkka dihtii studeanttat, dahje dihtorčeahpit.
Eiseválddit maid barget dan ovdii ahte badjeolbmuid lasihit dan spiehkastanlistui, čállá NRK Sápmi.
B-port murmánskka neahttaaviissa čállosiin, dievdduid oassemobiliserema oktavuođas, boahtá ovdan ahte Guoládatnjárggas galget duháha dievdu mobiliserejuvvot.
Seammás go almmuhuvvui oassemobiliseren, de Ruošša bearráigeahččoorgána, Roskomnadzor, váruhii riikkamediaid geavahit aivve virggálaš stáhta dieđuid oassemobiliserema oktavuođas. Muđui mediaid áššit dakkár fáttás sáhttet bákkus giddejuvvot.