Norgga automobiilalihttu ja Circle K rávvejit dán vahkku vuddjiid mo biilla galgá páhkket beassášmátkái amas eai bartit jus fáhkka šaddet bisánit.
– Vuoje gulul, ale doama johtolagas. Ii gánnát dárrat joavdat johtilabbot bartii dahje gosa leažžat jođus, lohká Norges Automobilforbund (NAF) (Sámegillii Norgga automobiilalihttu) johtolatsihkkarvuođaráđđeaddi Marianne Melheim Madsen.
Son muitala Finnmárkkus leat eaktodáhtolaččat báikkálaš NAF-servviin vuordimin biilavuoddjiid golmma Circle K-stašuvnnas. Sii rávvejit vuodjinsiivvu birra, johtolatsihkkarvuođa birra, mo páhkket biergasiid mátkái ja mo sihkkarastit biilla. Sin gávnnat bearjadaga Hessengas, Leavnnjas ja Lávželuovttas. Ulbmil akšuvnnain lea eastadit duođalaš lihkohisvuođaid. Vaikko olusat leat čehppon páhkket biillaid, de lea vejolaš šaddat velá čeahpibut.
– Muitte jus šattat fáhkka bisánit ovdamearkka dihte 50 km/t leavttus, de gálvu mii ii leat sihkkaraston, nugo iPad, de das lea 12 kilo deaddu go deaivá du niskái. Jus beatnaga it leat sihkkarastán maŋŋebeaŋkkas, de sáhttá du deaivat seamma deattuin go smávva elefánta, lohká Marianne Melheim Madsen.
Na páhkket biilla mátkái:
*Losimus ja stuorimus gálvvu vuolemussii. * Rohpeboksii dušše sabehiid ja geahppa dávviriid. *Deavdde doarvái áimmu juvllaide. * Basa juvllaid ovdal go vuoddját. *Sihkkaraste biillas buot ealliid. * Litna dávvirat sáhttet leat maŋŋebeaŋkkas. *Dihtordulbosat ja telefovnnat galget maid sihkkarastojuvvot. *Muitte go biillas lea lossa gálvu, de láhtte biila eará láhkai go muđui. Vuoje várrogasat!
