-Almmuhus-
OĐĐASAT– Gávdno veahkki jus leat sevdnjes jurda­gat – vuosttaš lávki oažžut veahki...

– Gávdno veahkki jus leat sevdnjes jurda­gat – vuosttaš lávki oažžut veahki lea muita­lit geasa nu mo dus lea dilli 

-

-

Ráđđehusa vuoruhansuorgi lea psyhkalaš dearvvašvuođa ja ulbmil lea eastadit iešsorbmema. 

Ávvir čálii mannan vahkus Alfhild Beate Vuolab birra, guhte lea dáidaga bokte bidjan sániid váttes fáddái iešsorbmen ja psyhkalaš dearvvašvuohta. Alfhild Beate Vuolab lea válljen leat rabasin iežas psyhkalaš dearvvašvuođa birra. 

– Iešsorbmen lea stuorra servodat- ja álbmotdearvvašvuođaváttisvuohta, ja ráđđehusa ulbmil lea eastadit iešsorbmema, dadjá dearvvašvuođa- ja fuolahusministtar Ingvild Kjerkol.

Dutkan čájeha ahte birrasii okta juohke 20 olbmos vásiha goas nu eallimis iešsorbmenjurdagiid, čállá Helse Norge.

Rabasvuohta dehálaš

– Rabasvuohta lea dehálaš máŋgga siva geažil, ja seammás sáhttá leat váttis ja divrras doallat rabasvuođa almmolaččat. Dat mii orru riekta alcces, sáhttá leat riekta earáide. Muhto, jus eallin lea váttis ja jus dovdo váttisin eallit, de lea dehálaš leat rabas geasa nu geasa olbmos lea luohttámuš, sáhttá leat bearrašmiellahttu, ustit, dearvvašvuođadivššár, psykologa dahje hárjeheaddji, dadjá dearvvašvuođa- ja fuolahusministtar Ingvild Kjerkol.

Loga maid:
Seavdnja­deamos dovddut šadde dáiddan: – Háliidan dainna earáid bissehit

Pyhkalaš dearvvašuohta deháleamos vuoruhansuorgi

Álbmotdearvvašvuođainstituhta dieđuid vuođul  čájehuvvo ahte birrasii 600 olbmo válljejit loahpahit eallima, ja goalmmádasoassi sis leat almmáiolbmot. 

– Gávdno veahkki jus leat sevdnjes jurdagat, ja vuosttaš lávki oažžut veahki lea muitalit geasa nu mo dus lea dilli.  Dalle lea maid dehálaš ahte veahkki lea gávdnamis sutnje guhte dan dárbbaša. Psyhkalaš dearvvašvuohta lea okta dain deháleamos vuoruhansurggiin ráđđehusas. Mii leat álggahan barggu ráhkadit psyhkalaš dearvvašvuhtii ođđa ceahkkálastinplána masa lea várrejuvvon ruhta, dadjá ministtar. 

Nannet gielddaid bálvalusaid

Ráđđehus áŋgiruššá nannet psyhkalaš dearvvašvuođafálaldagaid sidjiide geain leat psyhkalaš váttut. Vuođđun fálaldagaide galgá leat hálddašan- ja geavaheaddjeperspektiiva ja váikkuhit dasa ahte eallindilli buorrána olbmuin geain leat psyhkalaš váttut. Fálaldagat galget vuosttažettiin lágiduvvot ja addot lagasbirrasis. Spesialistadearvvašvuođabálvalus galgá doarjut gieldda doaimmaid ja addit sivvadiđoštan- ja dikšofálaldagaid go dilli lea duođalaš.

– Ráđđehusa ceahkkálastinplána galgá nannet gieldda bálvalusa, muhto galgá maid sihkkarastit kvalitehta ja lasihit kapasitehta. Danne lea mii addán birrasii 350 miljovnna ruvnno dán jagi (2022) nannet vuosttašceahki dearvvašvuođadoaimma, ođđa ovttasbargojoavkkuid, gelbbolašloktema, heahtetelefovdna ja ráđđeaddima borranváttuid birra.  Mánát ja nuorat leat vuoruhuvvon, lohká Ingvild Kjerkol.

-Almmuhus-