Mannan vahkkus registrerejedje Gáivuonas 15 ođđa koronanjoammuma, njoammun lea lassánan ovddit vahkku ektui.
– Gáivuona suohkanis njoammu koronavirus seamma láhkai go eará guovlluin, dat mearkkaša ahte koronanjoammun lea lassánan beliin ovddit vahkku ektui. Mii vuordit ahte dát joatkašuvvá ovddas guvlui, čállá Gáivuona váldodoavttir Anita M. Pedersen suohkana neahttasiidduin.
4. vahkkus registrerejuvvojedje 15 ođđa koronanjoammuma Gáivuonas. Suohkana váldodoavttir dieđiha ahte eai leat nákcen guorrat buot njoammumiid ja ahte ođđa bagadusaid vuođul eai šat čađat seammalágan njoammunguorrama go ovdal. Ovddit vahkkus ledje Gáivuonas guhtta koronanjoammuma.
– Jáhkkimis njoammu omikronvariántta maiddái Gáivuonas. Dát variántta lea láivi deltavariántta ektui, muhto dat njoammu sakka jođáneappot olbmos olbmui. Boahkuhuvvon olbmot ožžot veahá nurvo ja kánske febera mii bistá moadde beaivvi. Mánáin leat sullasaš dávdamearkkat, čállá Pedersen.
Gáivuona suohkanis juhket jođánisiskosiid doavtterkantuvrras ja ráđđeviesus. Dállodoalut gos lea njoammun, olbmot geain leat dávdamearkkat ja olbmot geat barget servodatkritihkalaš doaimmain vuoruhuvvojit.
