Sámi Dáiddačehpiid Searvvi jahkečoahkkin hástala intensiveret barggu oččodit autonomalaš sámi dáiddamusea.
Sámi Dáiddačehpiid Searvi čállá preassadieđáhusas ahte Norgga Kulturráđđi álggii 1974:s oastit sámi dujiid, árbevirolaš sámi dáiddadujiid. Áigodagas 1974-78 viiddiduvvui ortnet maid fátmmastit sámi govvadáidaga. Sámi Dáiddačehpiid Searvi bijai vuosttaš geardde Sámi Dáiddamusea áššelistui 1992:s. Dalle ledje jo 500 dáiddaduoji/dáidaga oston.
– Geavahuvvo ollu almmolaš ruhta sisaoastimii, ja eambo dáidagat ánssášit ostojuvvot. Mii čállit dál 2022 ja čoakkáldagas leat dál badjel 1500 dáidaga ja sámi dáidaga maid jearahit sihke smávit ja stuorit riikkaidgaskasaš dáiddaarenaide, čállet cealkámušas man searvvi stivrrajođiheaddji Lene E. Westerås lea ovddidan.
Sii čállet viidáseappot ahte ii gávdno vel čájehanarena ja gaskkusteapmi, dahje dutkan dán stuorra čoakkáldahkii.
– Čoakkáldagas leat menddo unnán bargit gokčat jearaldagaid sámi dáidaga luoikkaheapmái. Dáiddačoakkáldat lea hui dehálaš ja das lea stuorra potensiála sihke sámi dáiddáriidda, sámi kultuvrii ja muđuid olles máilbmái. Sámi Dáiddamusea DÁL, čállet sii.
