Sámi Dáiddárráđđi lea liige jahkečoahkkimis válljen ođđa jođiheaddji ja nubbijođiheaddji.
Sámi Dáiddárráđi (SDR) liige jahkečoahkkimis njukčamánu 20. beaivvi 2024 válljejuvvui Klemet Anders Buljo, Sámi Komponisttaid searvvis (SK) ođđa jođiheaddjin jahkái. Son váldá badjelasas jođihandoaimma maŋŋá Karen Anne Buljo Juoigiid Searvvis (JS). Lene E. Westerås Sámi Dáiddačehpiid Searvvis (SDS) válljejuvvui nubbinjođiheaddjin. Dan dieđiha SDR preassadieđus.
– SDR lei bovden liige jahkečoahkkimii ságastallat ođđa stivramálle ja rievdadit njuolggadusaid. Eanetlohku miellahttoservviin dorjo njuolggadusrievdadusa, ja stivramálle mas leat čieža stivralahtu, ja buot ovddasteaddjit leat miellahttoservviid beales, čállá SDR.
Dát lea SDR
Sámi Dáiddárráđđi lea goavdesearvi čieža dáiddársearvái: Sámi Komponisttat/Samiske Komponister (SK), Sámi Lávdi/Samiske Teaterarbeidere (SL), Juoigiid Searvi (JS), Sámi Filbmabargiid Searvi/Samiske Filmarbeiderforbund (SFS), Sámi Dáiddačehpiid Searvi/Samisk Kunstnerforbund (SDS), Mun dajan/Foreninga samiske forfattere (MD) ja Sámi Girječalliid Searvi/Samisk Forfatterforening (SGS).
SDR galgá ovddidit miellahttoservviid ekonomalaš, dáiddafágalaš ja dáiddapolitihkalaš beroštumiid, ja hukset fierpmádaga ja oainnusin dahkat sámi dáiddáriid miehta Sámi.
