Sámi Dáiddárráđi jahkečoahkkimis njukčamánu 20. beaivvi 2024 válljejuvvui Klemet Anders Buljo Sámi Komponisttaid searvvis ođđa jođiheaddjin jahkái. Son váldá badjelasas jođihandoaimma maŋŋá Karen Anne Buljo Juoigiid Searvvis.
Lene E. Westerås Sámi Dáiddačehpiid Searvvis (SDS) válljejuvvui nubbinjođiheaddjin.
SDR lei bovden liige jahkečoahkkimii ságastallat ođđa stivramálle ja rievdadit njuolggadusaid. Eanetlohku miellahttoservviin dorjo njuolggadusrievdadusa, ja stivramálle mas leat čieža stivralahtu, ja buot ovddasteaddjit leat miellahttoservviid beales.
SDR galgá ovddidit miellahttoservviid ekonomalaš, dáiddafágalaš ja dáiddapolitihkalaš beroštumiid, ja hukset fierpmádaga ja oainnusin dahkat sámi dáiddáriid miehtá Sámi.
