-Almmuhus-
-Almmuhus-
OĐĐASAT– Fosen-ášši lea váttes ášši, maiddái ráđđe­hussii

– Fosen-ášši lea váttes ášši, maiddái ráđđe­hussii

-

-

Sandra Borch ii loga diehtit man guhkes áigi manná ovdal go ráđđehus mearrida mo čuovvolit Fosen-duomu ášši. 

Eanandoallo- ja biebmoministtar Sandra Borch lei maid bearjadaga Norgga Boazosápmelaččaid Riikkasearvvi riikačoahkkimis, Ávvir válddii oanehis jearahallama sutnje Fosen-ášši birra. 

– Fosen-ášši lea váttes ášši, maiddái ráđđehussii. Munnje lea dehálaš doalahit buori gullahallama boazoealáhusain. Seammás gulahallet iešguđet departemeanttat go leat iešguđet ovddasvástádussuorggit. Munnje lea dieđusge dehálaš áimmahuššat guođohanealáhusa beroštumiid áššis ja áiggun dan ovddidit ráđđehussii, dadjá Sandra Borch. 

Golggotmánus diibmá celkkii Alimusriekti duomu Fosen-áššis, mas čujuhit ahte bieggafápmohuksen Storheias Åfjordas ja Haraheia Roan guovllus duolbmá boazodolliid rievtti kulturdoaimmaheapmái ON-konvenšuvnna ektui.

Fovsen Njaarke lullisiidda lea rahčan áššiin badjel 20 jagi, muhto vaikko Alimusriekti lea cealkán duomu áššis, de ii leat Oljo- ja energiijadepratemeanta, man duohken lea ášši, mearridan mo áigot čuovvolit duomu. 

Ášši ii leat čáhppes-vielgat

NBR jođiheaddji Ellinor Marita Jåma almmuhii ahte NBR gáibida ahte Fosen bieggamillorusttegat fertejit njeidot ja eatnamat fertejit addot ruovttoluotta boazoealáhussii . Sandra Borch ii loga ášši joavdan nu guhkás ahte lea mearriduvvon mihkkege áššis. 

– Dalle go mun jo álgen, de lei váttes ášši, eatge mii leat joavdan nu guhkás ahte lea dahkkon mearrádus áššis. Jáhkán dán áššis maid lea dehálaš  gávdnat čovdosa mii áimmahuššá boazoealáhusa, muhto eai dán áššisge leat čáhppes-vilges beallit, dadjá Sandra Borch.  Son ii loga sáhttit vástidit man guhkes áigi vel manná ovdal go ráđđehus dahká mearrádus Fosen-áššis. 

Fovsen Njaarke lullisiiddas eai lean delegáhtat dahje olbmot NBR riikačoahkkimis. 

Loga maid:
Fovsen boazo­doallit ballet ráđđe­husa gomi­hit Alimus­rievtti duomu

Ii dohkket

Sámediggepresideanta Silje Karine Muotka lea cealkán ahte Sámediggi ii  dohkket ahte ráđđehus ii  doahttal Alimusrievtti duomu.

– Mun deattuhan dattetge ahte áššejohtu sihke Sámedikki ja boazodoalu siiddaid mielas ii leat riekta iige leat vuođđun čovdosii mii sihkkarasttášii ahte Norga doallá iežas olmmošrievttálaš geatnegasvuođaid dán áššis, dajai sámediggepresideanta Silje Karine Muotka preassadieđáhusas juovlamánus diibmá. 

-Almmuhus-