Cuoŋománus čađahedje 91 proseantta vuodjingeahččaleami Finnmárkkus, riikkadásis ges 79 proseantta.
Stáhta geaidnodoaimmahat čađaha teoriijageahččalemiid ja vuodjingeahččalemiid sihkkarastin dihte ahte buohkain, geat galget vuodjit johtolagas, lea dárbbašlaš gelbbolašvuohta.
Norggas válde 15 892 olbmo teoriijageahččaleami cuoŋománus, 59 proseantta cevze. Finnmárkkus cevze eambbosat teoriijageahččaleami go riikkadásis. Oktiibuot válde 268 olbmo teoriijageahččaleami ja 68 proseantta cevze.
Maiddái vuodjingeahččaleamis lea stuorát ceavzilvuohta Finnmárkkus. Finnmárkkus lei 162 olbmos vuodjingeahččaleapmi, 91 proseantta čađahii ja oaččui vuodjinlobi. Riikkadásis ges ledje 9371 vuodjingeahččaleami, 79 proseantta cevze, čállá Stáhta geaidnodoaimmahat preassadieđáhusas.
