Finnmárkkus cevzet eambbosat sihke vuodjengeahččaleami ja teoriijageahččaleami.
Stáhta geaidnodoaimmahagas dieđihit ahte Finnmárkku sensorat čađahedje 255 vuodjengeahččaleami borgemánus. 93 proseantta kandidáhtain cevze vuodjengeahččaleami.
Finnmárkkus cevzet eambbosat vuodjengeahččaleami go muđui Norggas. Riikaviidosaččat cevze 79 proseantta vuodjengeahččaleami borgemánus.
Seamma mánus válde 285 olbmo teoriijageahččaleami Finnmárkkus, 58 proseantta cevze. Riikaviidosaččat cevze 56 proseantta teoriijageahččaleami.
Norggas čađahedje 39 602 olbmo vuodjengeahččaleami geassemánus, suoidnemánus ja borgemánus. Dat leat 428 eanet go diibmá. Ceavzinproseantta lei 79 guktuid jagiid.
