Romssas ja Finnmárkkus leat eambbogat go ovdal válljen fidnofágaoahpu joatkkaskuvllain.
Lea dušše moadde beaivvi ain vejolašvuohta ohcat joatkkaskuvllaide, muhto Romssa ja Finnmárkku oahppu ja integreren fylkkaráđđi, Bjarne Rohde, lea duđavaš loguin.
– Romsa ja Finnmárku lea buoremus riikkas fállat oahpposaji. Dat mearkkaša ahte buohkat geat oalle sihkkarit kvalifiserejuvvojit oahpposadjái, ožžot dan, dadjá Rohde preassadieđáhusas.
Oahppodirektoráhta (UDIR) loguid mielde ledje jagis 2020 Romssas ja Finnmárkkus ja Rogalánddas eanemus oahppit geat ožžo oahpahallišiehtadusa. Dalle ožžo 81,5 proseantta fidnofága oahppi oahpahallišiehtadusa. 2021:s juogadii Romsa ja Finnmárku vuosttaš saji Rogalánddain ja Vestlánddain, 83 proseanttain.
– Mii dárbbašat eambbo fágabargiid olu surggiin. Bargo- ja ealáhuseallin davvin lea bargan bures pandemiijas sihkkarastimis doarvái oahpposajiid. Dán giđa eai galggašii váilevaš oahpposajit hehttet ohppiid ohcamis fidnofágaide, dadjá Rohde preassadieđáhusas.
