Badjel bealis dain geat leat ohcan joatkkaskuvlii lea vuosttaš fágasávaldat fidnofága. Ohciidlohku fidnofágaide ii leat leamaš nu allat 2012 rájes.
– Boahteáiggis dárbbaša min servodat čeahpes ja gelbbolaš fágabargiid. Sii dat galget čoavdit daid stuora servodathástalusaid mat mis leat vuordimis. Danin mii leat bargan garrasit oažžut eanebuid ohcat fidnofágaide, dadjá máhttoministtar Kari Nessa Nordtun (Bb) preassadieđáhusas.
Fidnofágaid ohcciidlohku lea lassánan 1,4 proseantačuoggáin 2023 rájes 2024 rádjái, čájehit Oahpahusdirektoráhta logut.
Finnmárkkus leat eanemus fidnofágalaš ohccit vuosttaš jahkái joatkkaskuvllas, 71 proseantta ohcciin lea fidnofága vuosttaš sávaldahkan.
– Hui buorre ođas
Buot fylkkain earret Akershusas ja Oslos leat badjel 50 proseantta ohcan fidnofágaide.
Ovdalaš máhttoministtar ja dálá bargoministtar Tonje Brenna (Bb) čállá e-poasttas NTB:i ahte dát lea hui buorre ođas.
– Beare ollu nuorat leat dál olggobealde bargoeallima. Sivvan dasa lea earret eará go oallugiin váilu gelbbolašvuohta mii gáibiduvvo bargguide. Danin leage buorre go eanet nuorat válljejit dakkár oahpu mii addá sidjiide gelbbolašvuođa maid bargoaddit dárbbašit, čállá Brenna.
Eambbogat ohcet teknologiijafágii
Máŋga jagi lea lohku njiedjan, muhto dál ohcet eambbogat dearvvašvuođa- ja bajásšaddanfágii. 12 proseantta buot ohcciin lea dát vuosttaš fágasávaldat, ja nubbin stuorámus fidnofágalaš oahppoprográmma lea ges teknologiija ja industriija, 11 proseantta buot ohcciin leat dan ges sávvan.
Huksen-, luonddudoallo-, diehtojuohkinteknologiija ja mediafágat leat áidna fidnofágalaš oahppoprográmmat main ohcciidlohku lea veaháš vuollelis go diibmá.
©NTB
