Guovddášbellodaga Inga J. Eira oaivvilda ruvkeášši ja suohkanovttastumiid leat deháleamos válgaáššin Guovdageainnus.
Guovddášbellodaga Inga J. Eira oaivvilda ruvkeášši ja suohkanovttastumiid leat deháleamos válgaáššin Guovdageainnus.
Guovddášbellodaga sátnejođiheaddjeevttohas Inga J. Eira lea vástidan gažaldagaide maid Ávvir lea jearran bellodatnjunnošiin.
Ávvir lea jearran golbma gažaldaga bellodatnjunnošiin:
1. Guđe ášši anát don deháleamos válgaáššin din suohkanis?
2. Mii du oaidnu lea dan áššis?
3. Mat leat du váibmoáššit?
Loga maid: – Váikkuhusguorahallan nannešii suohkana
Deháleamos válgaáššin atná son ruvkeášši ja suohkanovttastumiid.
– Lean goappašagaid vuostá. Dasa lassin oaivvildan ahte galgat heaitit digaštallamis ruvkeášši, ii lea ii, dadjá Eira.
Nuorat ja vuorrasat váibmoáššin
Vaikke ruvkeášši ja suohkanovttastumiid oaivvilda ge deháleamos áššin, de leat sus eará váibmoáššit.
– Fertejit leat eanet ja buorit astoáiggefálaldagat mánáide ja nuoraide. Ođđa spábbačiekčanhálla ferte huksejuvvot farggamusat. Nu luovvanivččii hálla, mii geavahuvvo olu, eará doaimmaide maid mánát ja nuorat háliidit dahkat, lohká Eira.
Obbalohkái beroštuvvá Eira Báktehárjji hállas:
– Dohko ferte huksejuvvot stuorát gievkkan. Jus dan galgá ain láigohit heajaid várás, de berre doppe gávdnot albma gievkkan. Áinnas dakkár gievkkan man máŋggas sáhttet geavahit oktanaga. Doppe han livččii čahkat doallat máŋggaid konfirmašundoaluid oktanaga, mii fas livččii ávkin go mis leat unnán doallovisttit.
Eira oaivvilda Báktehárjji maid dárbbašit goargŋunseainni, ja muđuid ge ođasmahttit hálla.
– Nu mo oainnát de eanaš maid lean namuhan guoská min valáštallanhállii. Mun oaivvildan ahte mii fertet giktalit mánáid eret dihtoriiguin ja tv–šearpmain, ja oažžut sin lihkadit eanet. Ja das dárbbašat fálaldagaid ja rusttegiid.
Vaikke Eira leage beroštuvvan mánáid ja nuoraid dilis, de namuha maid vuorrasiidfuola váibmoáššin.
– Min boarrásat fertejit oažžut oadjebas boarásmanbeivviid. Sii fertejit beassat orrut doppe gos háliidit dahje gos álot leat orron, jus ii ruovttuin de juobe ruovttugilis ge. Mii fertet muitit ahte dat bálvalusat mat vuorrasiida leat dál, sáhttet leat dakkárat maid ieža šaddat geavahit boahtteáiggis.
