FeFo bisuha finnmárkulaččaid sierravuoigatvuođaid

Norgga Olgoáibmoeallin (Norsk Friluftsliv) lei earret eará váidán dan go Finnmárkkuopmodat (FeFo) regulere galle reaiddu olggobeale Finnmárkku ássit besset geavahit.

FeFo mearridii ođđajagemánu 19. beaivvi ahte olggobeale olbmot eai oaččo oaggut eambbo go ovttain stákkuin dahje siimmain háválassii Finnmárkkuopmodaga fierbmeráddjenguovlluin.

– FeFo ii dulko Finnmárkkulága seamma ládje go Norgga Olgoáibmoeallin dahká dán čuoggás. Mii árvvoštallat mearrádusa leat eaktun mii biddjo go oaggunkoarta osto, iige oaggun ráddjemin. Buohkain lea vejolašvuohta oastit oaggunkoartta, muhto FeFo lea dáinna mearrádusain bidjan dárkilat eavttuid oaggunlobiide. Danne dát čuokkis ii leat min mielas dakkár man sáhttá váidit, go ii sáhte váidit eará go dakkár mearrádusaid mat ráddjejit dan ahte olbmot besset oaggut, lohká FeFo stivrajođiheaddji Marit Kirsten A. Gaup preassadieđáhusa bokte.

Moaitán maiddái dadjanvuogi

Eananeaiggádiidmearrádusat mat ráddjejit stággo- dahje siibmalogu, gávdnojit olu sajiin. Earret eará de leat Oslomarka Guolástanhálddahusas dákkár ráddjejumit Oslomarka oagguma dáfus.

Norgga Olgoáibmoeallin váidala maid go FeFo lea geavahan doahpaga «resurssaid ja báikkálašolbmuid geavaheami vuhtiiváldin» mearrádusas mii lea váidon. Searvi oaivvilda dán spiehkastit dan rámmas maid Finnmárkkuláhka addá.

– Mii eat oainne dadjanvuogi ge leat dakkárin man sáhttá váidit, go dan hápmi ii ráddje dan ahte olggobeale olbmot besset oaggut. Mii baicce oaivvildat ahte dadjanvuohki ollásit čuovvu Finnmárkkulága ulbmilparagráfa. Das čuožžu ahte eanan- ja luondduresurssaid hálddašeapmi galgá dahkkot nu ahte boahtá buoremusat ávkin fylkka ássiide. Jus resurssaid vuhtii váldin dagaha ahte lea dárbu ráddjet mo dan resurssa ávkkástallet, de lea áibbas guovddážis dan veardádallat báikkálaš olbmuid geavahemiin, lohká Gaup.

Norgga Olgoáibmoeallima váidda sáddejuvvo dál Gielddalaš- ja ovdánahttindepartementii gos dahket loahpalaš mearrádusa.